Amerika: Biz İranın dəstəklədiyi təhdidlərə qarşı İsraili güclü şəkildə dəstəkləyirik

Ağ Evin Milli Təhlükəsizlik Şurasının sözçüsü Adrienne Watson, Livan Hizbullahının İsrailin quzeyindəki Məcdəl Şəms bölgəsində uşaq futbol meydançasına edilən ölümcül raket hücumundan məsul olduğunu və ABŞ-ın İranın dəstəklədiyi təhdidlərə qarşı İsraili güclü şəkildə dəstəklədiyini açıqlayıb.

Watson iyulun 28-də bazar günü verdiyi açıqlamada dedi:  "Bu, onların (Hizbullah) raketi idi və nəzarət etdikləri ərazidən buraxılıb".

O, Məcdəl Şəmsə edilən hücumu qlobal şəkildə pisləməyə çağırıb və Vaşinqtonun Hizbullahdan gələn təhdidlərə və İslam Respublikasının dəstəklədiyi digər təhdidlərə qarşı İsrailin təhlükəsizliyinə verdiyi dəstəyin “möhkəm və sarsılmaz” olduğunu vurğulayıb.

İyulun 27-də İsrailin nəzarətində olan Colan təpələrində bir kənddə futbol meydançasına raket hücumu nəticəsində 12 nəfər ölüb. Bu hücumda da 13 yaralı var.

İsrail Xarici İşlər Nazirliyinin məlumatına görə, ölənlərdən 10-u 10-16 yaş arasındadır.

Livan Hizbullahı bu hücumun məsuliyyətini üzərinə götürməyib və bu hücumda heç bir rolunun olmadığını açıqlayıb.

Ağ Evin Milli Təhlükəsizlik Şurasının sözçüsü bəyanatını davam etdirərək əlavə edib ki, Vaşinqton Livan və İsrail sərhədində münaqişələrə son qoymaq və bu ərazilərin sakinlərinin öz evlərinə qayıtması üçün diplomatik həll yolları axtarır.

Həmas üzvləri ötən il 7 oktyabrda İsrailin güneyinə hücum edərək 1200-ə yaxın insanı öldürmüş, 250-dən çox insanı girov götürmüşdülər.

Bu hücuma cavab olaraq İsrail Qəzza zolağında geniş hərbi əməliyyata başlayıb. Digər tərəfdən, Hizbullah və Yəmən husilərinin Həmas-a dəstək olaraq bu qarşıdurmaya girməsi son 9 aydır bölgədə qeyri-sabitliyin artması narahatlığını artırıb.