فەرماندەی پۆلیسی "گۆنبەدی کاوس"ی پارێزگای گولیستان ڕایگەیاند، دوو فەقێی سوننە مەزهەب لەو شارەدا بە زەربی گولـلە کوژراون.
"مەحمود عەلیفەر" یەکشەممە ١٤ی خاکەلێوەی ١٤٠١ لەلێدوانێکدا بۆ ئاژانسی هەواڵی "ئیسنا"ی ئێرانی وتی، ئەو دوو هاوڵاتیە شەوی ڕابردوو لە بەر دەم خوێندگای ئاینیی گۆنبەدی کاوسدا کراونەتە ئامانجی هێرشێکی چەکداری.
پۆلیس ناسنامەی ئەو دوو هاوڵاتییەی بە" گوڵ‌محەمەد ئاخوند پێژمان" و "عەبدوڕەحمان ئاخوند خوجە" ڕاگەیاندووە.
هێرشی سەر ئەو دوو فەقێ سوننەمەزهەبە لەکۆتایی یەکەم شەوی مانگی ڕەمەزاندا و لەپاش بەجێ هێنانی نوێژی تەراویحدا هاتۆتە ئاراوە.
ئەوەش سەرنجی چاودێران و هاوڵاتیانی ڕاکێشاوە و ئەم گومانەی هێناوەتە گۆڕێوە کە هێرشەکە بە مەبەستگەلی سیاسی و ئایدیۆلۆژیک ئەنجام درابێت.
گۆنبەدی کاوس لەڕووی دیموگرافییەوە بە شارێکی تورکەمەن‌نشینی سوننەمەزهەب دەناسرێت.
بەگوێرەی ئامارە ڕەسمییەکان، نزیکەی هەشت بۆ ١٠ لەسەدی دانیشتووانی ئێران سوننە مەزهەبن، کە پێکدێن لە هاوڵاتیانی کورد، بەلوچ و تورکەمەن.
کۆماری ئیسلامی لە سەرەتای دامەزرانیەوە بۆ ئێستا هەمیشە بە ناکۆکییەوە لەگەڵ کەمینە ئیتنیکی و ئاینییەکانی دانیشتووی ئێران جووڵاوەتەوە.
تێبینییەکەت بنووسە