"جۆ بایدن"، سەرۆککۆماری ئەمریکا دەڵێت، پابەندە بەوەی ناوی سوپای پاسداران لە لیستی گروپە تیرۆریستییەکاندا بهێڵێتەوە، تەنانەت ئەگەر ئەم بڕیارە ببێتە هۆی کۆتاییهاتنی بەیەکجاریی دانوستانەکانی بەرجام.
بایدن لە گفتوگەیکدا لەگەڵ "کەناڵ ١٢"ـی تەلەڤیزیۆنی ئیسرائیل جارێکی دیکە جەختی کردەوە، کە ئەمریکا بەکارهێنانی "زۆر" بە دوا بژاردە دەزانێت بۆ ڕێگری لەوەی کۆماری ئیسلامی دەستی بگاتە چەکی ئەتۆمی.
سەبارەت بە ئەگەری هاوکاریی ئەمریکا و ئیسرائیل بۆ ئەو مەبەستەش وتی لەو بارەیەدا قسەناکات و پاشان جەختی کردەوە "ئێران ناتوانێت وەدەست بخات."
سەرۆککۆماری ئەمریکا هەروەها وتی، "دۆخی ئێران بەرەو خراپیی زیاتر دەچێت ئەگەر کۆماری ئیسلامی چەکی ئەتۆمی وەدەست بخات، پێویستە نزیک بینەوە لە ڕێککەوتنی بەرجام و بەمە ئەوان لە چەکی ئەتۆمی دوور ڕابگرین."
ئەم قسانەی جۆ بایدن لەکاتێکدایە، دانوستانەکانی نێوان ئێران وئەمریکا بۆ ژیاندنەوەی ڕێککەوتنی بەرجام لە مانگی ڕەشەمەی ساڵی پارەوە وەستاوە و وەک چاودێران باس دەکەن، ناکۆکیی سەرەکیش لەسەر هێشتنەوە یان لابردنی ناوی سوپای پاسداران لە لیستی گروپە تیرۆریستییەکاندایە.
بایدن لەبەشێکی دیکەی ئەو گفتوگۆیەدا وتی، "دۆناڵد ترامپ" بە چوونە دەرەوە لە ڕێککەوتنی بەرجام هەڵەیەکی گەورەی کرد، چون ئێران لەئێستادا زیاتر لە جاران نزیک بۆتەوە لە چەکی ئەتۆمی.
حەزدەکەی بۆ ئێڕانوایەر بنووسیت؟
بابەتەکانی خۆت بەش بکە
تێبینییەکەت بنووسە