ئەنجامی کۆبوونەوەی داخراوی حکوومەت و مەجلیس؛ هۆکاری سەرەکی ناڕەزایەتییەکان داواکارییە ئابوورییەکانە

مەجلیسی شۆرای ئیسلامی و حکوومەت لە کۆبوونەوەیەکی داخراو‌دا، ڕایانگەیاند داواکاریی سەرەکی خەڵک لە ناڕەزایەتییەکان‌دا بۆ "داواکارییە ئابوورییەکان" بووە.

لە کاتێک‌دا ڕۆژانە ژمارەیەکی زیاتر لە پیشەکان و ڕێکخراوەکان پەیوەست دەبن بە مانگرتنەکان و ناڕەزایەتییە سەراسەرییەکانەوە و پشتیوانی لێ‌دەکەن، وتەبێژی  دەستەی سەرۆکایەتی مەجلیسی شۆرای ئیسلامی، لەسەر ئەم کۆبوونەوە بە پەیامنێرانی وت  "بەشی سەرەکی" ئەو بابەتانەی گفت‌وگۆیان لەسەر کراوە "بۆ بژێویی و باری ئابووری خەڵک دەگەڕایەوە و مەجلیسی شۆرای ئیسلامی لەسەر چارەسەر کردنی ئەم کێشانە جەختی کردووەتەوە."

لەم کۆبوونەوەدا جگە لە سەرۆکی هەرسێ دەسەڵاتە سەرکییەکە، وەزیرانی ئیتلاعات، پیشەسازی، کانگا، بازرگانی و سەرۆکی ڕێکخراوی بەرنامە و بوجە لە لایەن حکوومەتەوە و هەروەها سەرۆکی کۆمسیۆنی فەرهەنگی، بەرنامە و بوجە و شەش نوێنەر لە لایەن مەجلیسەوە وتاریان پێشکەش کرد.

لە درێژەی ئەم کۆبوونەوەدا "نیزامەدین مووسەوی" وتی "بەشێکی زۆر" لەو بابەتانەی خرایە بەر باسەوە "بۆ بژێویی و ئابووری خەڵک دەگەڕایەوە و مەجلیسی شۆرای ئیسلامی لەسەر چارەسەر کردنی ئەم کێشانە جەختی  کردووەتەوە."

وتەبێژی دەستەی سەرۆکایەتی مەجلیس بە ئاماژە کردن بە ناڕەزایەتییەکانی ئەم دواییانە وتی: "بەشدار بووانی ئەم کۆبوونەوە بەم ئەنجامە گەیشتن کە "باشترین ڕێگە بۆ ڕووبەڕوو بوونەوە" لەگەڵ ناڕەزایەتییەکان، گرینگی‌دان بە داواکارییە ڕاستەقینەکانی خەڵکە کە زۆربەیان بۆ بژێوی ژیان و باری ئابووری خەڵک دەگەڕێنەوە."

هەروەها بە ئاماژە کردن بە ڕاپۆرتەکان "بە تایبەت لە بواری ئابووری و کەمیی دەرمان" دەڵێت ئیبراهیم ڕەئیسی لەو کۆبوونەوەدا جەختی کردووەتەوە "کێشەکانی بژێوی خەڵک" چارەسەر بکرێت.

ئەمە لە حاڵێک‌دایە کە "مەجید میرئەحمەدی"، جێگری ئەمنییەتی و ئینتزامی وەزیری وڵات، ڕۆژی یەکشەمە لە وتووێژێک‌ لەگەڵ میدیا حکوومەتییەکان‌دا وتی: "ڕێژی دەست‌گیر کراوان لە ناڕەزایەتییە سەراسەرییەکان کە زۆربەیان هیچ پیشەیەکیان نەبووە، نزیکەی لە سەتا  ٤ تا ٥ بووە. 

لە درێژەدا جەخت دەکاتەوە و دەڵیت: " نابێت وا بیر بکەینەوە سەرچاوەی بنەڕەتی ئەم ڕووداوانە، کێشە ئابوورییەکانە، ئەم بابەتە هەیە، بەڵام هۆکاری سەرەکی نییە؛ ناڕەزایەتی بەرامبەر نادادپەروەرییەکانە.”