مەولەوی عەبدولحەمید، ئیمامی جومعە و جەماعەتی ئەهلی سونەتی زاهیدان لە نوێژی هەینیی ئەمڕۆ، ٧ی ڕێبەنداندا، وتی: "نەتەوەی ئێران دژی سزای لەسێدارەدانە. نەتەوەی ئێران لەسێدارەدان ڕەت دەکاتەوە و لەسێدارەدانی بۆ هێچ شوێنێکی ئێران و جیهان ناوێت."
ئیمامی جومعە و جەماعەتی زاهیدان لە وڵامی ڕەخنەکان سەبارەت بە بێدەنگیی ئەو بەرامبەر لەسێدارەدانەکان لە سعوودیا وتی: "بە سعوودیایش دەڵێین کە نابێ لەسیدارەدان هەبێت. لە ئایینی ئیسلامدا لەسێداردان نییە جگە لە نموونەکانی قەساس و تایبەتدا. قەساس کاتێکە لە کوشتن بێت. دەکرێت ئەویش لە ڕێگای وەرگرتنی ڕەزامەندیی بنەماڵەوە پێشی پێ بگیرێت."
لە حەوتووەکانی ڕابردوودا چوار کەس لە ناڕازیانی ئێران لەسێدارە دران و ژمارەیەکی زۆریش بە تۆمەتگەلی "موحارب" و "ئەفساد فیلئەرز" هەڕەشەی بەڕێوەبردنی سزای لەسێدارەدانیان لەسەرە.
بەڕێز ئەبدولحەمید هەروەها وتوویەتی کە نەتەوەی ئێران خوزیاری ئاشتی و سڕینەوەی گرژییەکانە.
مەولەوی عەبدولحەمید بە ڕاشکاوی وتی: "پێویستە پێوەندییەکانی دەرەوە گرژیان لەسەر نەمێنی و ئێران ببێتە وڵاتی ئاشتیخوازی. دەبێت ئاشتی لە یەمەن و سووریا و ئۆکراین و هەموو جیهاندا بەرقەرا بێت."
بەپێی ڕاپۆرتەکان، ڕۆژێک پێش بەڕێوەچوونی نوێژی هەینیی ئەهلی سونەت لەم شارەدا، کەشی ئەمنییەتیی لە زاهیداندا قورستر ببوەوە. ڕۆژی پێنجشەمە ٦ی ڕێبەندان، ماڵپەڕی مافی مرۆیی "حاڵوەش" کە هەواڵەکانی تایبەت بە سیستان و بەلووچستان ڕووماڵ دەکات، باسی لە تووند کردنەوەی کەشی ئەمنییەتی لە زاهیدان کردبوو و وتبووی: "لە سەروبەندی نزیک بوونەوە لە هەینی، و ناڕەزایەتییەکانی خەڵک، هێزە ئینتزامی و ئەمنییەتییەکان گەشێکی قورسی ئەمنییەتیان بەسەر شارەکەدا زاڵ کردووە."
تێبینییەکەت بنووسە