شورای هەماهەنگی ڕێکخراوە پیشەییەکانی مامۆستایانی ئێران لە ڕاگەیەندراوێک‌دا، بەردەوامیی دۆسیەسازی بۆ مامۆستایان و داسەپاندنی سزاکانی وەک دەرکردن، خانەنشینی زۆرەملێ، دوورخستنەوە لە خزمەت، دوور خستنەوە لە گرووپ و…. بە دژی مامۆستایان مەحکووم کرد.
ئەم شورایەی مامۆستایان لە ڕاگەیەندراوەکەی خۆی‌دا بەرامبەر داسەپاندنی سزای خانەنشینیی زۆرەملێ بۆ مامۆستایان کاردانەوەی نیشان دا و هەروەها نووسیویەتی: "لە درێژەی دۆسیەسازییە نایاسایی و مەبەست‌دارەکان بۆ مامۆستای قوتابخانە و زانکۆکان، هاوکاری بەتوانا، ڕۆشنبیر و خۆش ناوی کوردستان، مامۆستای فیزیکی قوتابخانەکانی سەقز، خاتوو "شیلان یوسفی" بە پێشینەی ۲۳ ساڵ وانە وتنەوە، لە دوای دۆسیەسازی و سکاڵای حیراسەتی شار و پارێزگا، بە داسەپاندنی بڕیارێکی نایاسایی کە لە لایەن دەستەی یەکەمی سەرپێچییەکانی بەڕێوەبەرایەتی گشتی پەروەردەی کوردستان دەرکراوە، بە خانەنشینی زۆرەملێ و دوورخستنەوە لە دوو گرووپ مەحکووم کراوە."
لە کۆتایی ئەم ڕاگەیەندراوەی شورای هەماهەنگی ڕێکخراوە پیشەییەکانی مامۆستایانی ئێران‌دا، وێڕای مەحکووم کردنی ئەم سزا نایاساییانە، داسەپاندنی سزا یەک لە دوای یەکەکانی وەک دەرکردن، خانەنشینی زۆرەملێ، دوورخستنەوە لە گرووپ، دوورخستنەوە لە خزمەت و… بە دژی مامۆستایان لە لایەن وەزارەتی پەروەردە و بارهێنانەوە بە هۆی کەشی سەربازی و ئەمنی" زانیوە کە دەستی بەسەر ئەم وەزارەتخانەدا گرتووە.
هاوکات لەگەڵ نزیک بوونەوە لە ساڵوەگەڕی ناڕەزایەتییەکانی"ژن، ژیان، ئازادی" لە ساڵی ڕابردوو، ئەم شورایە بۆ "ڕووبەڕوو بوونەوە لەگەڵ ئەم ڕەوتەدا" بانگهێشتی مامۆستایانی کردووە.
حەزدەکەی بۆ ئێڕان‌وایەر بنووسیت؟
بابەتەکانی خۆت بەش بکە
تێبینییەکەت بنووسە