ایسلام مدنيتی و ایرشاد ایداره‌سی‌نین یئتکیلیلری تهران کیتاب سرگیسی‌نین گوونلیک امکداشلاری ایله، تورکجه کیتابلاری اله کئچیریب و کیتابلارین بیر حیصه‌‌‌سینی توپلاییبلار.
آذربایجانلی مدنی فعال و ناشر سعید موغانلی شخصی اینستاگرام صفحه‌‌‌سینده یازیب کی، مدنيّت و ایسلامی ایرشاد رسمیلری تهران سرگیسینده تورکجه کیتابلارین ساتیشی‌نین قارشیسینی آلیبلار.
بایاتیلار، آذربایجان ناغیللاری، صمد بهرنگی‌نین حکایه‌‌لری، نسیمی‌نین دیوانی، پروفسور زهتابی‌نین اثرلری، باغلاما پنجره‌نی، آذربایجان تاریخی، آذربایجان جوغرافیاسی و ... نشر ایجازه‌سی اولان بیر نئچه کیتاب دا توپلانان کیتابلار سیراسیندادیر.
سون ایللرده آذربایجانین چئشیدلی شهرلرینده تورکجه کیتابلارین ناشرلری تورکجه کیتابلارین نشرینه ایجازه‌نین وئریلمه‌دیگی و ایرشاد ناظرلیگی‌نین سانسور اویغولاذیغینی بیلدیریبلر.
ایرانین ایرشاد ناظرلیگی تورکجه کیتابلارین چاپینا ایجازه وئریلمه‌سی سورجینی اوزون‌موددتلی و چتین بیر ایشه چئویریب و بیر چوخ ناشر بیر چوخ پروبلئملرله اوزلشدیگی اوچون تورکجه کیتابلارین چاپیندان ایمتینا ائدیرلر.
بو سورج ۱۲ اسفند ۱۴۰۰-دن رئیسی حؤکومتی‌نین ایشه باشلاماسیندان سونرا داها دا گوجلنمیش، آنا دیلینده کیتاب چاپینا، نومایشینه، تورکجه کیتاب سرگیلری‌نین، تئاتر و صنعت اثرلری‌نین کئچیریلمه‌سینه قارشی یؤنلمیش سیاستلر آرتمیشدیر.
یوروم یازماق