فارس ایالتی‌نین اقلید شهری‌نین پولیس رئیسی بو شهرده ۳۸ نفرین حبس ائدیلدیگینی آچیقلاییب و اونلاری "سس-کوی سالماق" و "قانونسوز حرکتلر" ایله اتهام ائدیب.
ایرنانین وئردیگی گؤره، سرهنگ مراد صارمی دئییب کی، بو شخصلر ایکی گون ایچینده ماکسیموم عملیات قوه‌لریندن ایستیفاده ائدیلمکله توپلومسال گوونلیگی یاخشیلاشدیرماق و چرکلنمیش اراضیلری تمیز‌له‌مک پلانی‌نین حیاتا کئچیریلدیگی شهرین براق بوغازی‌نین گزینتی حیصه‌‌‌سینده ساخلانیلیبلار.
اقلید پولیس رئیسی بو پلانین پولیسلرین خالقین گوونلیگینی پوزماق نيتینده اولانلارا قارشی سرت تدبیرلر گؤرمک مقصدی داشیدیغینی بیلدیریب و حوقوق-موحافیظه اورقانلاری‌نین مومکون پوزونتولارلا موباریزه‌یه حاضر اولاجاغی ایله هده‌له‌ییب.
صارمی‌نین سؤزلرینه گؤره، پلانین سونوجو ۱۸ اتومبیلین اله کئچیریلمه‌سی و ایستراحت یئرلرینده وطنداشلاری ناراحات ائتمک اوچون "سس-کوی و قئیری-قانونی حرکتلره" سبب اولان ۳۸ نفرین حبسی اولوب.
اقلید پولیس رئیسی ساخلانیلانلارین قانونسوز حرکتلری ایله باغلی آچیقلاما وئرمه‌ییب. آنجاق ایرانداکی بسیج کیمی حربی و یاریم‌حربی قوه‌لر گنجلری ایستراحت یئرلرینده سیخیشدیرماغا و یا ساخلاماغا داوام ائدیر.
بو حرکتلرین سون حاللاریندان بیرینده، ۱۵ اردیبهشت ۱۴۰۱-جی ایل، جوما آخشامی گونو، گیلان ایالتی‌نین صومعه سرا پولیس کوماندیری اوچ گنج یولجونون حبس اولوندوغونو اعلان ائتدی و اونلارین حبسینه سبب کیمی، اونلارین اییرنج و قئیری-عادی گئییملری اولدوغونو بیلدیردی.
یوروم یازماق