اورمیه بیلیم‌یوردونون اوستادی دئدی: اورمیه گؤلو قورویور و اگر گلن سو ایلی کئچن سو ایلی کیمی اولارسا، قالان سویون بوخارلانماسی و گؤلون تامامیله قوروماسی احتیمالی یوکسکدیر.
او، گؤلده قالان سویون حجمینی بئله ایضاح ائدیب: اؤلچوسو باخیمیندان گؤلون تقریباً یوزده اونو قالیب، سویون حجمینه گؤره ایسه سولو ایل اولان ۱۳۷۵-جی ایلله موقایسه‌‌ده موطلق یوزده ۵-دن آزدیر. اونا گؤره دئیه بیله‌رم کی، اورمیه گؤلو قورویور و اگر گلجک سو ایلی کئچن سو ایلی کیمی اولارسا، چوخ گومان کی، قالان سو بوخارلاناجاق و گؤل تامامیله قورویاجاق.
سون زامانلاردا آذربایجانلی مدنی فعاللار اورمیه گؤلونون سون دورومونا اعتراض اولاراق، آذربایجانین چئشیدلی شهرلرینده اورمیه گؤلونو دستکله‌ین پلاکاتلار یایاراق و سوسیال شبکه‌لرده ترند اولان #SaveUrmiaLake هشتگینی قوراشدیراراق خالقین دقتینی اورمیه گؤلونون سون نفسلرینه چکمه‌یه چالیشیبلار.
اوزمانلارین فیکرینجه، اورمیه گؤلونون ساحللرینده توز طوفانلاری و آکتیو دوز فیرتینالاری ۵۰۰ کیلومتره قدر مسافه‌‌نی قت ائده بیلر.
کئچن آیلاردا دوغو آذربایجان اکین و طبیعی قایناقلار بیرلیگی تشکیلاتی‌نین رئیسی دئمیشدی: گؤل قورودوقجا بؤلگه‌نین اکینی و ۱۴ میلیون اینسانین حیاتی تهلوکه آلتینا دوشور.
او بیلدیرمیشدی کی، اورمیه گؤلونون جانلانماماسی ایله اؤلکه‌نین قوزئی-باتیسیندا دوزلو توز حادثه‌‌‌سی‌نین شاهیدی اولاجاغیق و یئرآلتی سو رزرولری‌نین شورانلاشماسی ایله یاناشی، بؤلگه‌ده اکینچیلیک ده محو اولاجاق.
ایندی ایسه آذربایجانلی فعاللار رییسی حؤکومتی‌نین بو مسئله‌‌یه ذره قدر دقت یئتیرمه‌دیگینی و بوتؤولوکده حؤکومتین بو بؤحرانی حل ائتمک اراده‌سی‌نین اولمادیغینی بیلدیریر.
یوروم یازماق