موعلیملر گونو ایله عینی واختدا تهران موعلیملر بیرلیگینین ایداره هئیتینین عضوو " اسماعیل عبدی" اینقیلاب کئشیکچیلری اطلاعاتی طرفیندن چاغیریلیب.
داها اؤنجه جزاسینی چکمک اوچون ۱۳۹۴-جو ایلین تیر آییندان ۱۴۰۲-جی ایلین آذر آیینا قدر حبسخانادا اولان جناب عبدی، عالی محکمهنین یئنیدن موحاکیمهنی قبول ائتمهسی سونراسی گیروو قارشیلیغیندا حبسدن آزاد ائدیلدی.
وئریلن بیلگیلره گؤره، بو موعلیملر بیرلیگی فعالی هله ده ایشینی و گئچیمینی ساغلاما فورصتی تاپا بیلمهدن یئنیدن چاغیریلیب. ایران٬وایرین الده ائتدیگی بیلگیلره گؤره، ائیتیم ناظرلیگی ایران موعلیملر بیرلیگینین کئچمیش باش کاتیبی اسماعیل عبدینین ایشه قاییتماسینا و یا امکلیلیگه چیخماسینا قارشی چیخیب و اونون وکیللرینین تعقیبلری ایندییهدک سونوجسوز قالیب.
جناب عبدیدن باشقا بیر چوخ موعلیملر بیرلیگی فعالی دا موعلیملر گونونده گوونلیک قوروملارینا چاغیریلیب و اونلاری موعلیملر گونونده موعلیملرین اعتراض آکسییاسیندا ایشتیراک ائتمهمهک ایله هدهلهییبلر.
یوروم یازماق