دونن، جوما آخشامی، ۷ اردیبهشت، اینقیلاب کئشیکچیلری سیمنان ایالتینده بیر قروپون حبس ائدیلدیگینی اعلان ائتدی و بو شخصلرین سیمنان شهرینده‌کی حربی تاسیسلره سالدیری پلانلاشدیردیقلارینی بیلدیردی.
سیمنان قائم قرارگاهی "سیمنان اطلاعاتی"نین مامورلاری طرفیندن ۲۰، ۲۲ و ۲۴ فروردینده "قدر گئجه‌لری"نده سیمنان شهری‌نین حربی مرکزلریندن بیرینه سالدیری پلانلاشدیران بو شخصلرین بللی ائدیله‌رک حبس ائدیلدیگینی آچیقلاییب.
یاییملانان خبرلره گؤره، شوعار یازماق، ۱۳۹۸و ۱۴۰۱-جی ایللرین اعتراض آکسییالاریندا ایشتیراک ائتمک بو شخصلرین باشقا اتهاملاری سیراسیندادیر. ایسلام جمهورییتی اؤزللیکله ده سون آیلاردا عومومی اعتراضلاری یاتیرماق اوچون اعتراضچیلارا آغیر اتهاملار ایره‌لی سوروب.
اینقیلاب کئشیکچیلری‌نین بو آچیقلاماسیندان باشقا، ایندیه قدر بو حبسلرله باغلی داها آیرینتیلی بیلگی یوخدور. اینقیلاب کئشیکچیلری اطلاعات تشکیلاتی اطلاعات ناظرلیگینه پارالئل بیر تشکیلاتدیر و اؤزللیکله عومومی اعتراضلار زامانی اعتراضچیلاری باشقا دؤولت اورقانلاری‌نین نظارتی اولمادان ساخلاییب، حبس ائدیب و یاتیریر.
یوروم یازماق