زنجانلی قایا دیرمانیشجی قادین "الناز رکابی" تخمیناً ۸ آیا یاخین اؤلکهدن چیخیشینا قاداغا قویولدوقدان سونرا نهایت، ایتالیادا کئچیریلهجک اولمپیک سئچیم یاریشینا گئدیر.
ایرانوایرین قایناقلاری تصدیقلهییب کی، ایدمان و گنجلر ناظرلیگی الناز رکابیدن اؤلکهیه قاییتماق اوچون ضمانت کیمی ائو سندی ایله یاناشی، بیر میلیارد تومن ده آلیب.
۱۴۰۲-جی ایلین فروردین آییندا اولوسلارآراسی اولمپیک کومیتهسی سرت بیاناتلا ایران میلی اولمپیک کومیتهسیندن قادین ایدمانچیلارا تضییق و اؤلکهنی ترک ائتمک اوچون ایدمانچیلاردان گیروو گؤتورمه سورجینی دایاندیرماسینی ایستهییب. بونا باخمایاراق، قادین ایدمانچیلار هله ده دؤولت قوروملارینین تضییقی آلتیندادیر و ایدمان و گنجلر ناظرلیگی ده الناز رکابیدن اؤلکهنی ترک ائتمک اوچون سند و بیر میلیارد تومن آلیب.
الناز رکابی ۱۴۰۱ مهر آییدا گونئی کره یاریشلاریندا مجبوری حجابسیز ایشتیراک ائدیب. بوندان سونرا او، ایران ایسلام جمهورییتینین سئولداکی سفیرلیگینین امکداشلاری و ایدمان ناظرلیگینین گوونلیک اوزره نومایندهسی طرفیندن ایران ایسلام جمهورییتینین سفیرلیگینه تحویل وئریلیب و اورادان ایرانا قاییدیب. بو مدت ایچینده الناز رکابینین اؤلکهیه قاییتماسینی تعمین ائتمک اوچون بو قایا دیرمانیشجینین قارداشی داود رکابی اینقیلاب کئشیکچیلری طرفیندن گیروو گؤتورولوب.
یوروم یازماق