قزوین ایالتی‌نین خسته‌خانادان اؤنجه تعجیلی یاردیم و قضا ایداره‌سی‌نین رئیسی "باراجین پارکیندا دالفک ایلنجه پارکی‌نین دؤنمه چارخی‌نین دوشمه‌سی سونوجوندا آزی ۱۱ نفرین یارالاندیغینی" آچیقلاییب.
دؤولت عاید مهر خبر آژانسی‌نین وئردیگی بیلگیلره گؤره، قزوین قزوین اورژانسی‌نین رئیسی حسن اسماعیلی دئییب: قزوین‌ین دالفک ایلنجه پارکیندا اوشاق مئیدانچاسی‌نین دؤنمه چارخی‌نین دوشمه‌سی سونوجوندا ۱۱ نفر یارالانیب و خسته‌خانایا گؤندریلیب. حادثه بو باغدا باش وئرن کیمی درحال یانغین و فؤوقلاده حاللار قوه‌لری حادثه یئرینه گله‌رک قورتارما ایشلرینه باشلاییبلار.
قزوین فؤوقلاده حاللار یئتکیلیسی آرتیریب: بو حادثه‌‌‌ده ۶ اوشاق و ۵ بؤیوک یارالانیب و اونلار تعجیلی اولاراق قزوین‌ین رجایی و رازی خسته‌خانالارینا گؤندریلیب. تعجیلی یاردیم رئیسی اونو دا بیلدیریب کی، بوتون خسارت آلانلارین عومومی دورومو یاخشیدیر.
حسن اسماعیلی آرتیریب کی، بو قضانین سببلری اوزمانلار طرفیندن آراشدیریلیر، لاکین چوخ گومان کی، دؤنمه چارخی تئکنیکی سورون باش وئرمه‌سی بو حادثه‌‌‌یه سبب اولوب.
ایراندا ایلنجه پارکلاری کیمی عومومی یئرلرده نؤقصانلار و گوونلیک واسطه‌‌‌لری‌نین اولماماسی هر ایل قضالارا سبب اولور. گوونلیک آوادانلیغی‌نین یارادیلماسیندا اقتصادی قایناقلارین آز اولماسی ایراندا بو کیمی حادثه‌‌‌لرین باش وئرمه‌سی فاکتورلاریندان حساب اولونور.
یوروم یازماق