آنایاسا قورویوجولار شوراسیندا دونن کئچیریلن اوتورومدا بو شورادا باشقانلیق سئچکیسی کئچیریلیب کی بو اوتورومدا آنایاسا قورویوجولار شوراسی‌نین باشقانلیق هیئتی و کاتیبی بو شورا عضولری‌نین سس‌وئرمه‌سی ایله داها بیر ایل مدتینه گؤروده قالیب و ۹۷ یاشلی احمد جنتی کاتیبلیک گؤر‌وینه داوام ائده‌جک.
ایران خبر آژانسلاری خبر وئریر کی، آنایاسا قورویوجولار شوراسی‌نین سؤزچوسو هادی طحان‌نظیف چارشنبه گونو (۲۸ تیر ۱۴۰۲-جی ایل) آنایاسا قورویوجولار شوراسی‌نین سحر ایجلاسی‌نین کئچیریلمه‌سینه ایشاره ائده‌رک دئییب: سحر اوتوروموندا آنایاسا قورویوجولار شوراسی‌نین یئنی ایل ایداره هئیتی‌نین سئچیمی کئچیریلیب. “احمد جنتی” کاتیب، “سیامک ره‌پیک” کاتیب معاونی، “هادی طحان نظیف” ایسه آنایاسا قورویوجولار شوراسی‌نین سؤزچوسو وظیفه‌‌‌لرینده ساخلانیلیب.
آنایاسا قورویوجولار شوراسی‌نین اوتوروموندا “عومومی اعتراضلارا” و اؤلکه‌نین دورومونداکی ديیشیکلییه اوستو اؤرتولو ایشاره ائدن احمد جنتی اوچونجو شیعه ایمامینا محرم عزادارلیغینی توپلومون مدنی اتمسفری‌نین یئنیدن قورولماسی و جانلانماسیندا اؤنملی عامل کیمی قیمتلندیریب و دئییب: بو سببدن ایسلام دوشمنلری هر زامان بو گؤزل عنعنه‌‌نین تنزولو و ساپماسی اوچون پلانلار قوروبلار.
احمد جنتی‌نین بو یاخینلاردا درج اولونان شکیللرینده تک باشینا یئریمک یئتنگی‌نین بئله اولمادیغی و چتینلیکله دانیشدیغی حالدا اونون گؤرو مدتی اوزادیلیب. بوندان علاوه، احمد جنتی‌نین بو شورانین کاتیبی کیمی سرت مؤوقئیی و ایسلام جمهورییتی‌نین بوتون سئچکیلرینده آدایلارین گئنیش شکیلده رد ائدیلمه‌سی بیر چوخ تنقیدلرله اوزلشیب.
سانال اورتامدا بعضی قوللانیجیلار جنتی‌نین آنایاسا قورویوجولار شوراسیندا کاتیبلیک مدتی‌نین اوزادیلماسینی حؤکومتین بو ایلین اسفندینده کئچیریله‌جک مجلیس سئچکیلرینی پلانلاشدیرماسی‌نین علامتی کیمی قیمتلندیریبلر.
جنتی ایندییه‌دک ۱۰ مجلیس، ۱۲ جمهورباشقانلیغی سئچکیسی و ۴ اوزمانلار شوراسی سئچکیلرین نظارتینده و ایجراسیندا ایشتیراک ائدیب و آنایاسا قورویوجولار شوراسی‌نین کاتیبی اولاراق اؤزل رول اوینایاراق اونون ۱۹ دؤوره‌سینده ایشتیراک ائدیب.
یوروم یازماق