ایرانین چئوره قوروما تشکیلاتی‌نین باشقانی علی سلاجقه، اورمیه گؤلو اوزرینده بولودلارین یوخ اولماسی ادعاسی‌نین علمی شکیلده آراشدیریلمالی اولدوغونو آچیقلاییب.
چارشنبه گونو، ۶ دی گونو، ایران ایسلام جمهورییتی نوماینده هئیتی‌نین ایجلاسی چرچیوه‌سینده سلاجقه ژورنالیستلره دئییب: متان گازی‌نین اورتیمی ایله بؤلگه‌ده سیجاقلیغین آرتماسی و اورمیه گؤلو اوزرینده‌کی یاغیشلی هاوا جبهه‌سی‌نین آرادان قالدیریلماسی آراسینداکی ایلیشگی ایله باغلی بعضی فرضيه‌‌لرین اؤیره‌نیلمه‌سی و آراشدیریلماسی لازیمدیر.
اورمیه بیلیم‌یوردونون پروفسورو و اورمیه گؤلو آراشدیرما انستیتوسونون چئوره قوروما شؤبه‌سی‌نین مودیری بهزاد حصاری بولودلارین یوخ اولماسی ایله باغلی آچیلان موذاکیره‌لری فرضيه حساب ائده‌رک، بئله بیر مسئله‌نین ایندییه‌دک ثبوتا یئتیریلمه‌دیگینی بیلدیریب.
بوندان اؤنجه باتی آذربایجان ایالتی وکیللر بیرلیگی‌نین ایداره هئیتی‌نین رئیسی علی علیزاده بو قورومون “اورمیه گؤلونون قوروماسینا نه‌دن اولانلارا” قارشی شیکایت ائتدیگینی آچیقلامیشدی.
راپورلار گؤستریر کی، چئوره ساحه‌‌‌سینده اوزمانلارین اورمیه گؤلونون جانلانماسینا آرتیق اومیدلری یوخدور.
اؤتن ایل اورمیه گؤلونون قوروماسینا اعتراض اولاراق بیر چوخ تورک مدنی فعال حبس ائدیلیب و ایشگنجه‌لره معروض قالیب.
یوروم یازماق