ایرانوایره چاتان خبره گؤره تورک مدنی فعال و سیاسی محبوس یوروش مهرعلی بیگلو دونن ۲۹ بهمن ۱۴۰۲ گوناورتادان سونرا ۲ میلیارد تومنلیک گیروو قارشیلیغیندا تبریز مرکزی حبسخاناسیندان مووقتی اولاراق سربست بوراخیلیب.
۱۰۴ گون حبسده اولان جناب مهرعلی بیگلو تبریز مرکزی حبسخاناسینین قرنطینهسینه کؤچورولدوکدن سونرا سربست بوراخیلیب.
یوروش مهرعلی بیگلو ۱۶ آبان ۱۴۰۲-ده حبس اولوندوغو واختدان آزاد اولوندوغو گونه قدر تبریز اطلاعات ایدارهسینین تجریدخاناسیندا گوونلیک گوجلرینین تضییقی آلتیندا وکیلسیز ساخلانیلاراق عائلهسی ایله گؤروشمکدن محروم ائدیلمیشدی و سونرا تبریز مرکزی حبسخاناسیندا قرنطینهیه آپاریلدی و یالنیز ایکی دفعه یعنی ۲۳ آبان و ۲۸ بهمن گونو عائلهسی ایله قیساموددتلی [تخمیناً بیر دقیقه] دانیشدی.
آیت (یوروش) مهرعلیبیگلونو کئچمیش اویرنجی فعال و تانینمیش تورک سیاسی فعالیدیر. سون ایکی اونیللیکده او، مدنی و سیاسی فعالیتینه گؤره دفعهلرله توتولوب و حبس ائدیلیب.
آیت (یوروش) مهرعلیبیگلو ۱۳۹۱-جی ایلده بیر سیرا باشقا آذربایجانلی مدنی فعاللار ایله بیرلیکده حبس ائدیلیب، او، آغیر فیزیکی و روحی ایشگنجهلره معروض قالیب، آیلارلا تک آداملیق حوجرهده حبس اولونوب و عدالتسیز بیر موحاکیمهده توپلام ۹ ایل حبس جزاسینا محکوم ائدیلیب.
جناب مهرعلیبیگلو قئیری-اینسانی شرایطده بئش ایلدن چوخ حبس حیاتی یاشادیقدان سونرا نهایت ۱۳۹۵-جی ایلین اسفند آییندا تبریز حبسخاناسیندان سربست بوراخیلیب.
یوروم یازماق