چوار بەندکراوی بەندی ٣ی زیندانی شیبانی ئەهواز بە هۆکاری نادیار گیانیان لەدەستداوە و ١٥ بەندکراویش بۆ نەخۆشخانەیەکی دەرەوەی زیندان گوازراونەتەوە.
بەرپرسانی ئەم زیندانە تا ئێستا هیچ زانیارییەکیان سەبارەت بە هۆکاری ئەم ڕووداوە نەخستۆتە ڕوو و سەبارەت بە ڕەوشی تەندروستی ئەو زیندانیانەی کە گواستراونەتەوە بۆ نەخۆشخانە هیچ زانیارییەک لەبەر دەستدا نییە.
بەپێی ڕاپۆرتی ڕێکخراوی مافی مرۆڤی "کارون"، بەندی ٣ی زیندانی شیبان بە هەبوونی زیندانیانی تۆمەتبار بە دزی و مادەی هۆشبەر ناسراوە.
هەندێک لە ڕاپۆرتەکان باس لەوە دەکەن کە دەرمانیان بەهەڵە داوە بە زیندانییەکان و بووەتە هۆی ژەهراویبوونیان، بەڵام ئەم زانیاریانە هێشتا پشتڕاست نەکراوەتەوە.
ئەم ڕووداوە نیگەرانییەکی بەرفراوانی لە نێوان بنەماڵەی ئەم زیندانیانە و چالاکانی مافی مرۆڤ درووست کردووە، هەروەها داوا کراوە کە بەدواداچوونێکی شەفاف و خێرا بۆ ڕوونکردنەوەی وردەکارییەکانی ئەم ڕووداوە و دڵنیابوون لەوەی کە دووبارە نەبێتەوە، ئەنجام بدریت.
تێبینییەکەت بنووسە