خالقین موجاهیدلری تشکیلاتی جوما آخشامی، ۱۲ خرداد گونو بیر نئچه ویدئو یاییملایاراق، بهشت زهرانین، روح‌الله خمینی‌نین مقبره‌سی‌نین و بیر سیرا باشقا حؤکومت مرکزلری‌نین گوونلیک کامئرالارینی هکله‌دیگینی و اونلاری ال‌چاتماز ائتدیگینی آچیقلاییب.
تشکیلات هکله‌نمیش گوونلیک کامئرالاری‌نین تهران بلدیه‌سینه عاید اولدوغونو، لاکین اونلاردان علی خامنه‌ای‌نین اوفیسی، ایران جمهورباشقانلیغی، آیریجا اطلاعات ناظرلیگی، اینقیلاب کئشیکچیلری و پولیس اورقانلاری طرفیندن ایستیفاده ائدیلدیگینی بیلدیریب.
سیبئر سالدیری ایسلام جمهورییتی‌نین بانیسی روح‌الله خمینی‌نین اؤلومونون ایلدؤنومونه بیر گون قالمیش باش وئریب.
خالقین موجاهیدلری تشکیلاتی بو گون گونورتادان سونرا تهران بلدیه‌سینه باغلی ۱۵۰-دن چوخ اینترنت سایتی و سیستمی سیندیراراق، اؤن صفحه‌‌‌لرینده مریم و مسعود رجوی‌نین شکیللرینی نومایش ائتدیردیگینی و خمینی‌یه لعنت و خامنه‌ای‌یه اؤلوم کیمی شوعارلار درج ائتدیگینی بیلدیریب.
تهران بلدیه‌سی و منیم تهرانیم سیستمی اینترنت سایتلاری بوگونکو سیبئرسالدیری هکرلرین سالدیریسینا معروض قالان سایتلار سیراسیندادیر.
تهران بلدیه‌سی‌نین انفورماسیون و ایله‌تیشیم تشکیلاتی بو سایتلارا هکر سالدیریلارینی تصدیقله‌یه‌رک بونو قصداً موداخیل آدلاندیریب.
سون بیر ایلده ایسلام جمهورییتی‌نین حساس گوونلیک مرکزلری دفعه‌‌لرله سیبئر سالدیریا معروض قالیب کی، بونلاردان ان چوخ خبر اولان عدالت علی قروپونون اوین حبس‌خاناسی‌نین گوونلیک کامئرالارینی سیندیرماسی اولوب.
یوروم یازماق