ایرانوایره چاتان خبره گؤره، بو گون سحر ۶ اردیبهشت ۱۴۰۳-جو ایل، جوما آخشامی، موناقیشه زامانی باشقا بیر وطنداشی قتله یئتیردیگینه گؤره دؤرد ایل اؤنجه اعداما محکوم ائدیلمیش “فرزاد خادم” آدلی محبوسو سقز حبسخاناسیندا اعدام ائدیلیب.
اؤتن ایللرده بعضی حاللاردا مدنی فعاللارین، رضایت و باریشیق کومیتهلرینین چابالاری بو حؤکمون ایجراسینا مانع اولسا دا، سون زامانلار همین شخصین عائلهسینین و یاخینلارینین چاباسی قوربانین عائلهسینی قانع ائتمهییب.
اولوسلارآراسی عفو تشکیلاتینین ۱۵۵ اؤلکهده اینسان حاقلارینین دورومونو قیمتلندیرن "دونیادا اینسان حاقلارینین دورومو" آدلی ایللیک راپورو چارشنبه گونو یاییب و قئید اولونوب کی، ایسلام جمهورییتی ۲۰۲۲-جی ایلده اعدام حؤکملرینین ایجراسینی ایکی قات آرتیریب و زورلا ایتکین دوشمهلری، ایشگنجه و باشقا قئیری-اینسانی، آلچالدیجی و قدار داورانیشلاری اورگانیزه شکیلده حیاتا کئچیریلیر.
یوخاریدا آدی چکیلن راپوردا “موحاریبه” و “یئر اوزونده فساد” کیمی “ بلیرسیز اتهاملار”ا گؤره اعدام حؤکملرینین وئریلمهسینه توخونان و نارکوتیک جینایتلری، ماليه فسادلاری و تخریبات اوچون گئنیش یاییلمیش اعداملارا گؤره دئییلیب کی اعدام حؤکمو باسقی آلتیندا سیاسی اعتراضچیلار و آزلیقلار اوچون ایستیفاده اولونور.
سؤزوگئدن راپوردا “قادین، حیات، آزادلیق” اعتراضلاریندان سونرا ۶ گنجین مجبوری اعترافلاردان سونرا اعدام ائدیلمهسیندن بحث ائدیلیر و “مظلوم” بلوچ آزلیقلاری آراسیندا اعداملارین باشقا یئرلره نیسبتاً داها چوخ اولدوغو، آیریجا اعداملارین داها چوخ اولدوغو و ۱۸ یاشیندان کیچیک اینسانلارین دا اعدام ائدیلدیگی بیلدیریلیر.
یوروم یازماق