تهران بیلیم‌یوردلاریندا اونلارلا اؤیرنجی‌‌نین یئمکدن زهرلنمه‌سیندن بیر نئچه هفته سونرا بو دفعه زنجاندا ۵۰ اؤیرنجی عینی تیپلی زهرلنمه یاشاییبلار.
زنجان تمل بیلیملر بیلیم‌یوردونون رییسی بابک کریمی ایرنایا دئییب: بو اؤیرنجی‌‌لر جوما آخشامی، ۲۶ خرداددا معده-باغیرساق زهرلنمه‌سی علامتلری ایله خسته‌خانایا آپاریلیب و اونلاردان بیری خسته‌خانایا یئر‌لشدیریلیب.
جناب کریمی‌نین سؤزلرینه گؤره، بو اؤیرنجی‌‌لرین بیلیم‌یوردو یئمکلریندن زهرلنمه‌سینی قطعی شکیلده تصدیق‌له‌مک اوچون آراشدیرمالارا باشلانیلیب و تصدیق اولونارسا، یئمک ایشنه باخان ایش‌گؤتورن جدی شکیلده جزالاندیریلاجاق.
بو ایل ۲ خرداد گونو فرهنگیان بیلیم‌یوردونون ۵۵ اؤیرنجی‌‌سی، بیر گون سونرا ایسه تهرانین ایمام صادق بیلیم‌یوردونون ۳۹ اؤیرنجی‌‌سی زهرلنمه ایله خسته‌خانایا یئر‌لشدیریلیب.
بو خبرین آردینجا فرهنگیان بیلیم‌یوردونون معاونی بیلیم‌یوردو اؤیرنجی‌‌لری‌نین یئمکدن زهرلنمه‌سینی و بونون یاتاق‌خاناداکی یئمکلرله علاقه‌‌‌سینی تکذیب ائتسه ده، اوچ هفته سونرا بیلیم‌یوردونون اؤیرنجی ایشلری اوزره تشکیلاتی‌نین رییسی هاشم داداش‌پور بونو تصدیقله‌ییب و دولاییسی ایله بونو بیلیم‌یوردو یئمیی‌نین کئیفیتی ایله باغلی اولدوغونو دئییب.
جناب داداش‌پور بیلیم‌یوردلاری‌نین ایش‌گؤتورنلرله باغلادیغی آنلاشمادا قئید ائتدیگی مقاملاری اقتصادی شرطلر و ارزاق محصوللاری‌نین باها اولماسی کیمی قیمتلندیره‌رک، وضعيت پیسلشرسه، ایش‌گؤتورنلرین بؤیوک ضرر گؤره‌جه‌یینی دئییب.
اؤتن ایللرده بیلیم‌یوردو یئمکلری‌نین کئیفيتسیز اولماسی سببیندن اؤیرنجی‌‌لرین یئمکدن زهرلنمه‌سی ایله باغلی بیر نئچه حادثه، او جومله‌‌‌دن ۱۳۹۸-جی ایلین مهر آییندا تهران علم و صنعت بیلیم‌یوردونون ۲۰۰-دن چوخ اؤیرنجی‌‌سی‌نین زهرلنمه‌سی و ۱۳۹۶۰-جی ایلده یزد بیلیم‌یوردونون ۴۰۰ اؤیرنجی‌‌سی‌نین زهرلنمه‌سی باره‌ده بیلگی یاییلمیشدی.
یوروم یازماق