اؤنجه‌دن ده صنعتچیلرین صنعت فعالیتلرینی داوام ائتمه‌لرینی "خواهش ائدن" ۱۳-جو حؤکومتین ایرشاد ناظری ایرانین رسمی خبر آژانسلاری ایله صؤحبتینده بو ایستگی گوونلیک قوروملاری‌نین تضییقی آلتیندا ائتدیگینی بیلدیریب.
محمد مهدی اسماعیلی بو گون ۲۹ آذر ۱۴۰۱-جی ایلده خبر آنلاین طرفیندن درج اولونان خبرده بئله دئییب: میلی گوونلیک شوراسی و عالی میلی گوونلیک شوراسی دا داخیل اولماقلا، گوونلیک قوروملاری صنعتی فعالیتلرین نورمال کئچمه‌سی اوچون بیزی موتمادی اولاراق ایزله‌ییر و هئچ بیر پروبلئمیمیز یوخدور بو قونودا.
بونونلا بئله، جناب اسماعیلی تصدیق ائدیب کی، صنعتچیلرین فعالیتی داوام ائتسه بئله "تاماشاچیلارین ایشتیراکینا احتیاج دویدوغوموز تاماشاچی بؤلمه‌سینده ناراحاتچیلیق یاشادیق."
تئاتر، سینما و موسیقی ساحه‌‌‌سینده فعالیت گؤسترن چوخلو سایدا صنعت آدامی قادین، یاشام و آزادلیق اعتراضلاری سببیله صنعت فعالیتلرینی دایاندیریب و ایرشاد ناظرلیگیندن ایجازه آلماق ایستمیر.
کیتاب یایین ائولری و بعضی مولفلر ده بوندان سونرا ایسلام جمهورییتی ایرشاد ناظرلیگی‌نین تطبیق ائتدیگی یوخلامالارا و سانسورا بویون ایمه‌یه‌جکلرینی آچیقلاییبلار.
بونونلا بئله، ایرشاد ناظری بیلدیریب کی، حاضردا بیز ایصرار ائدیریک کی، هامی ایجازه آلسین و بیز اؤزوموز بئله تشبوث گؤستردیک.
ایرشاد ناظری‌نین بو ایستگی، اؤزللیکله ده موختلیف ساحه‌‌‌لر اوزره صنعت آداملاری آراسیندا منفی تپکیلر دالغاسینا سبب اولدو. بو باغلامدا سینماچی مانی حقیقی ایرشاد ناظرینه خطابا دئدی: بیز یاس توتوروق و عزیزلریمیزین جنازه‌لرینی بو اؤلکه‌نین دؤرد بیر یانیندا باسدیریریق، سیزین اوچون رقص ائتمه‌یه واختیمیز یوخدور.
یوروم یازماق