باتی آذربایجانین والیسی محمدصادق معتمدیان، مئدیایا وئردیگی آچیقلامادا بیلدیریب کی، قاراقیشلاق ساکینلری بو کندین اوتلاقلاریندا سدیم کربنات فابریکینین تیکینتیسینه اعتراض ائتدیکدن سونرا یاتیریمجی گئری چکیلیب.
شنبه گونو، بهمن آیینین ۱۴-ده محمدصادق معتمدیان باتی آذربایجان والیسی تعیین ائدیلدیکدن سونرا کئچیردیگی ایکینجی مطبوعات کونفرانسیندا بو ایالتین یئرلی مئدیاسینین توپلانتیسیندا قارا قیشلاقدا سدیم کربنات فابریکینین تیکینتیسینین سونا چاتماسی بارهده دئییب: اوزون مدتدیر کی، بؤلگهده گلیشمه یاراتماق اوچون یاتیریمجی جلب ائتمهیه چالیشیردیق، اونلار اعتراض ائدنده قانون تطبیق اولوندو؛ آما ایندی یاتیریمجی گئری چکیلیب.
بو مطبوعات کونفرانسیندا معتمدیان چئوره قوروما تشکیلاتیندان و طبیعی ثروتلر ایدارهسیندن سدیم کربنات فابریکینین تیکینتیسی اوچون ایجازه آلینمادیغینی تکذیب ائدیب.
داها اؤنجه باتی آذربایجانین چئوره قوروما تشکیلاتی بو فابریک اوچون ایجازه آلینماسی ایله باغلی بیلگیلرینین اولمادیغنی و طبیعی ثروتلر ایدارهسینین رئیسی ده دئمیشدی: "بونون بیزه دخلی یوخدور."
بو گؤروشده معتمدیان تحقیرآمیز توندا چئوره فعاللارینین و قارا قیشلاق کند ساکینلرینین کاوه سودا فابریکینین تیکینتیسینین چئورهیه وورا بیلهجک ضررلره قارشی اعتراضلارینی "شیشیرتمه" آدلاندیریب و دئییب: بو موبالیغهدیر، بیر دسته جاهیل آداملارین بینینی کورلاییر، یانلیش بیلگی وئریلیب.
یوروم یازماق