“Tejarat News” saytı İranda həkimlərin intiharına toxunan xəbərdə bu ilin əvvəlindən intiharlar arasındakı zaman intervalının 10 günə çatdığını və bu tendensiya davam edərsə, ilin sonuna qədər şokedici rəqəmin olacağını yazıb.
Son 47 gündə 5 həkimin intihar etdiyi ilə bağlı rəsmi statistikaya istinad edən bu hesabat İranda hər 10 gündə bir həkimin intihar etdiyini göstərir.
Keçmiş səhiyyə və müalicə naziri Həsən Haşimi Səhiyyə Nazirliyinin həkimlərin intiharı ilə bağlı susmasını biabırçılıq adlandırıb və deyib: “Səhiyyə nazirinin və onun digər həmkarlarının borcudur ki, sosioloqlar, psixoloqlar və başqa ekspertlərin yardımı ilə bu məsələləri araşdırsınlar və bu sarsıdıcı hadisənin qarşısının alınması üçün tez bir zamanda çarə tapsınlar”.
Son aylar tibb rezidentlərinin vəziyyəti və intiharları ilə bağlı çoxsaylı xəbərlər dərc olunub.
Həkimlərin intiharları ilə bağlı rəsmi statistikanın dərc edilməməsinə toxunan Tibb Bacıları Evinin baş katibi Məhəmməd Şərifi Müqəddəm Tejarat News-a deyib: Bu, ötən illərdə də olub, amma indi kiberməkanın köməyi ilə xəbərlər çox tez yayılır. Amma problem burasındadır ki, bu hadisələrin bəziləri ümumiyyətlə virtual məkanda dərc olunmur və bu səbəbdən biz mövcud statistik məlumatları əminliklə şərh edə bilmirik.
Məhəmməd Şərifi Müqəddəmin sözlərinə görə, Səhiyyə Nazirliyinin gənc həkimlərin və rezidentlərin vəziyyətinə diqqətsizliyi artıq praktikaya çevrilib.
Keçən ilin yanvarında təcili tibbi yardım üzrə mütəxəssis Nima Şəhriyarpur açıqladı ki, aparılan araşdırmalara görə, tibb ictimaiyyətinin üzvləri arasında intiharların sayı 3.1-5 dəfə artıb.
O əlavə edib ki, məsələn, ölkədəki 14 min tibbi yardımçısından hər il orta hesabla 13 nəfər intihar edir.
Şərhlər