عینی زاماندا، کرونا سببییله خستهخانالارا موراجعت ائدنلرین سایینین آرتماسی ایله صحیّه و درمان ناظرلیگی، ایش باغلانماسی ایله علاقهلی دؤرد معيّن قروپدا هر بیر شهرین و ایالتین رنگینه گؤره قرار وئریلهجهیینی آچیقلامیشدیر.
دیگر طرفدن قان ترانسفوزیون تشکیلاتینین باش مودورو، ایرانین پلازما درمانی ساحهسینده دیگر اؤلکلردن بیر آددیم اؤنده اولدوغونو ادعا ائتمیشدیر.
صحیّه ناظرلیگینین سؤزچوسو سیما ساداتلاری، دونن داها 2652 نفره کرونا تشخیصی قویولدوغونو، بونلاردان 1595 نفرین خستهخانایا یئرلشدیریلدیگینی و ایلک گوندن بو یانا توپلام 232.863 نفرین یولوخدوغونو سؤیلهدی. عینی گونده 148 دیگر خسته حیاتینی ایتیرهرک ایرانداکی کرونا اؤلوملرینین توپلام ساییسی 11 مین 106 نفره چاتدی.
صحیّه ناظرلیگینین سؤزچوسونون وئردیگی معلوماتا گؤره، اؤلکهنین اکثر ایالتلرینده خستهلرین و خستهخانالارا یئرلشدیریلن خستهلرین سایی آرتیر و خوزستان، کوردستان، باتی آذربایجان، دوغو آذربایجان، هرمزگان، بوشهر، رضوی خوراسان و کرمانشاه ایالتلری هله ده قیرمیزی وضعیتدهدیر.
محدودیّتلرین گئری قایتاریلماسی بارهده دانیشان صحیّه ناظرلیگینین «اطراف موحیط و ایش ساغلاملیغی مرکزی»،نین فنی معاونی«محسن فرهادی»، دئدی کی، کرونا ایله موباریزه عوذره میلّی قرارگاهین تصدیق ائتدیگی بیر قرارا اساساً، ایالت باش قرارگاهینین ایالتدهکی کرونا یاییلماسینین رنگینه گؤره ایالتلردهکی دؤرد ایش قروپونون فعالیّتی بارهده قرار وئرهجکلر. آغ شرایطده بوتون دؤرد گروپ، ساری وضعيّتده ایلک اوچ قروپ، نارینجی شرایطده ایلک ایکی قروپ و قیرمیزی وضعيّتده یالنیز بیرینجی قروپ ایشلهیه بیلر کی، بو دا ایمداد ایشلرینده اولان، درمان ایشلری و اینسانلارین یییهجک احتیاجلارینی قارشیلایانلاری احاطه ائدیر. ایالتلر داها چوخ صلاحیّت آلماق اوچون صحیّه و داخیلی ایشلر ناظرلرینه موراجعت ائتمهلیدیرلر و ایستکلری بو ناظرلیکلر طرفیندن تصدیقلنرسه داها چوخ صلاحیّت وئریلهجک.
ایران صحیّه ناظرلیگینین یولوخوجو خستهلیکلر مرکزینین مودورو «محمّد مهدی گویا»نین دئدیگینه گؤره، ایکی هفته عرضینده خوزستان، دوغو آذربایجان، هرمزگان، باتی آذربایجان، کوردستان، رضوی خوراسان ، بوشهر و کرمانشاه ایالتلری اؤلکهنین ان یوکسک درجهده کرونا یولوخدوغونون تثبیت ائدیلدیگی ایالتلر اولموشلار .
تهرانداکی کرونا ایله موباریزه عملیّاتلارینین فرماندهی علیرضا زالی، سون 24 ساعت عرضینده تهران خستهخانالارینین نورمال و رئانیماسییا بؤلوملرینده یئنی خستهلرین سایینین 7.9 فایز آرتدیغینی و 520 یئنی کرونالی خستهنین خستهخانایا یئرلشدیریلدیگینی آچیقلادی.
اونون دئدیگینه گؤره، خستهلرین سایینداکی ديَیشیکلیکلر سببییله دونن کرونا ایله موباریزه عوذره میلّی قرارگاها 6 بندلی بیر مکتوب یازاراق بیر هفته عرضینده تهران ایالتینده یئنی محدودیّتلر طلب ائدیلمیش.
فارس ایالتینین والیسی عنایتالله رحیمی، ایالتین بئش قیرمیزی شهرینه محدودیّتلرین قویولاجاغیندان خبر وئرهرک بو محدودیّتلره عمل اولونماسا، سرتلشدیریلهجهیینی دیله گتیردی.
قان ترانسفوزیون تشکیلاتینین باش مودورو پیمان عشقی، ایرانین بو گون علمی آراشدیرمالاردا ان چوخ پلازما ایستیفاده ائتدیگینی قئید ائدهرک، ایرانین خستهلیگی ایلک اولاراق چینده باشلادیغی گوندن بری آراشدیرماغا آلدیغینی و بونون دیگر اؤلکلره گؤره نیسبتاً داها ائرکن باشلادیغینی و بو ندنله دیگر اؤلکلردن بیر آددیم ایرهلیده اولدوغونو ادعا ائتمییدیر.
ایلام والیسی قاسم سلیمانی دشتکی، کروناویروس خستهلیگینین زیروهسینده جمعی بیر گونده بو کیچیک ایالتده 175 نفرین یولوخدوغونو سؤیلهدی. اونون دئدیگینه گؤره ایالتده ایندیکی دورومدا 5 شهر قیرمیزی وضعیتدهدیر و کرونا اولانلارین ساییسی سون 11 گونده 40 فایز آرتمیشدیر.
او علاوه ائتدی کی، ویلایتده بعضی محدودیّتلر قایتاریلاجاق، او جوملهدن ایدارهلرین ایش واختینی آزالتماق و عمومی یئرلرده ماسک تاخماق زورونلودور.
ایلام والیسینین سؤزلرینه گؤره، کورونا شرطلری داوام ائدرسه، محدودیّتلر ایستهنیلن سويّهیه قدر آرتیریلاجاقدیر.
لرستان والیسینین سیاسی و امنیتی ایشلری عوذره معاونی محمود ثمینی ده خبردارلیق ائتدی کی، آرتیق عیالتین اکثر شهرلرینده کرونانین یاییلماسی وضعيّتی سرحدی کئچیب و قیرمیزی حدّه چاتیب. وضعيّت بئله داوام ائدرسه، ایالتده درمان و موعالیجهیه اولان احتیاجین قارشیلانماسی ایچین الیمیزده هئچ بیر ایمکان قالمایاجاقدیر.
بو آرادا، لرستان طبّی علملر اونیوئرسیتئتینین رئیسی محمّد رضا نیکبخت، رئانیماسییا شؤبهسینده و وئنتیلیاتورلاردا یاتاقلارین آرتیمینا چاغیریش ائدهرک، قیرمیزی وضعیتده اولان 10 شهرده کرونا ویروسا یولوخانلارین سایینین آرتماسینا و برابرینده اؤلوملره سبب اولدوغونو بیلدیردی.
صحیّه ناظرینین معاونی قاسم جان بابایی، کروناویروسون بو گون قیرمیزی و صاباح آغا چئوریلهجک بیر خستهلیک اولمادیغینی و وضعيّتین تعریفینین هر هانسی بیر بؤلگهیه نیسبی اولدوغونو وورغولادی. او اساس ناراحاتلیغین آغ وضعیتده اولان ایالتلر اوچون اولدوغونو آچیقلادی چونکی بو ایالتلر هله پیک حدّه چاتمامیشلار. رسمی استاتیستیکلره گؤره، اؤلکهنین هئچ بیر ایالتینین آغ استاتوسو اولمادیغی حالدا، صحیّه ناظرینین معاونینین آغ ایالتلر حاقیندا نه دئمک ایستهدیگی بللی دگیل.
مشهد طبّی علملر اونیوئرسیتئتینین رئیسی محمّدحسین بحرینی، بوتون وطنداشلاری مشهد مقصدینه لازیمسیز سیاحتلردن چکینمهیه چاغیراراق، بو شهرده یاتان و آیاقدا درمان آلان کوروناویروس خستهلرینین آرتماسیندان و خستهخانالارین رئانیماسییا شؤبهلرینده خستهخانایا یئرلشدیریلن خستهلرین سایینین 50% آرتماسینا توخونموشدور.
گیلان طبّ علملری اونیوئرسیتئتینین صحیّه شؤبهسینین مودورو آبتین حیدارزاده گلهجکده ایالتده کرونا خستهلیگینین ایلک گونلرینده کی اولان وضعيّته قاییتماق تهلوکهسیندن دانیشدی. حیدرزاده کروناویروس خستهلیگینه یولوخانلارین سایینین و آیسییو یا موراجعت ائدنلرین سایینین گئتدیکجه آرتدیغینی و بونون عکسینه خستهخانادان چیخان خستهلرین سایینین آزالدیغینی و ایندی ایسه گونده 50 گیلانلینین خستهخانایا یئرلشدیریلدیگینی اعلان ائتدی.
بوشهرده خستهلرین سایی آرتیر و بوشهر طبّ علملری اونیوئرسیتئتینین صحیّه ایشلری عوذره معاونی عبدالمحمد خواجهئیان ،حال حاضیردا ایالتدهکی اوچ شهرین قیرمیزی وضعيّتینده اولدوغونو و دیگر اوچ شهرینده خبردارلیق مرحلهسینده اولدوغونو آچیقلادی.
سیستان و بلوچستاندا خستهخانالاری آرتیق تماماً دولو وزییتدهدیر و بودا ایالتین طبّی مسووللاری آراسیندا نیگرانچیلیق یاراتمیشدیر. زاهدان طبّی علملری اونیوئرسیتئتینین ساغلاملیق عوذره معاوینی مهدی طباطبایی، زاهدانداکی«بو علی» و « علی بنابیطالب» خستهخانالارینداکی کرونایا آیریلان بؤلوملرین پناسیلینین دولدورولدوغونو تصدیقلهدی و مؤوجود دورومون وضعيّتی داها دا کریتیک حالا گتیرهجهیینی بیلدیردی.
عینی زاماندا، زاهدان طبّی علملر اونیوئرسیتئتینین موعالیجه ایشلری عوذره معاونی «قاسم میری»، سیستان و بلوچستانین کرونا خستهلرینین اوچده بیرینین آی سی یو دا یاتدیغینی سؤیلهیهرک بو آرتیشین سون هفتهلرده باش وئرمهسینین سببینی خستهلرین موعالیجهیه گئج گلدیکلری اوچون اولدوغونو قئید ائدهرک بو بارهده نیگرانچیلیق ائلهدی.
ایران صحیّه مسووللارینین انکارینا باخمایاراق، بعضی والیلر هله ده چوخ سایدا اینسانین کرونا یولوخدوغونو گؤسترن استاتیستیک معلوماتلار وئریرلر؛ مثلا، گلستان والیسی هادی حقشناس، گرگانداکی اهالینین 50 فایزیندن چوخونون خستهلندیگینه دقت چکرک دئدی کی، بیر نئچه گون ایچینده خستهلرین و خستهخانایا یئرلشدیرمهلرین سایی آرتارسا، گلن هفته داها جدّی بیر قرار وئریلهجک و ایالت داخیلینده داها چوخ محدودیّت قویولاجاق.
اصفهاندا طبّ علملری اونیوئرسیتئتینین سؤزچوسو آرش نجیمی، اصفهان خستهخانالاریندا کسکین کرونا سیمپتوملاری اولان 106 نفرین خستهخانایا یئرلشدیریلمهسی و ایالتده کرونا خستهلرینین یوکسلمهسی ایله علاقه دار ایالتین یاخین گونلرده قیرمیزی وضعییته دؤنه بیلهجهگینی، قئید ائتدی. او آرتیردی کی، قرنطینه وضعيّتی ایسه کرونا ایله موباریزه عوذره میلّی قرارگاهین قرارینا باغلیدیر.
سون اولاراق گؤرونن او کی، حسن روحانی،«عاغیللی» سؤزونه چوخ ماراق گؤستریر، او حالدا کی کورونا ایله موباریزه ساحهسیندهکی صحو سیاست سببییله، کرونانین ایکینجی دالغاسینین ایلک دالغاسی قدر گوجلو گئری دؤنمهسینده ایرانی دونیادا ایلک مقاما چاتدیردی. روحانی، کرونا ایله موباریزه عوذره میلّی قرارگاهین ایختیصاصلاشدیریلمیش کومیتهلرینین رئیسلرینین ایجلاسیندا اعلان ائتدی کی، یئنی محدودیّتلر قیرمیزی وضعییتده و خبردارلیق آشاماسیندا اولان بؤلگهلره گؤره دقیق و تامامیله «عاغیللی» حِسابلامالارا اولاجاقدیر.
از بخش پاسخگویی دیدن کنید
در این بخش ایران وایر میتوانید با مسوولان تماس بگیرید و کارزار خود را برای مشکلات مختلف راهاندازی کنید
یوروم یازماق