ایرانداکی کرونانین ایکینجی دالغاسی 21دن چوخ ایالتده ائتکیسینی گؤستردی، بو ایالتلری‌نین بعضیلری‌نین وضعيتی هفته‌لردیر قیرمیزیدیر و بیر نئچه ایالتین خبردارلیقدا اولان شهرلری هر گون قیرمیزی وضعيتده اولان شهرلره علاوه اولونور. بو آرادا ایران جمهورباشقانی حسن روحانی، صحیه ناظری‌نین وئردیگی معلوماتلارا دایاناراق بیر سیرا شهرلرده کرونا خسته‌لیگی‌نین خبردارلیق و قیرمیزی وضعيتدن ساری و یا آغ وضعيته کئچمه‌سینین اومیدوئریجی اولدوغونو سؤیله‌دی.
آنجاق ایراندا دا کرونادان اؤتورو دونیانین بیر چوخ اؤلکه‌سینده اولدوغو کیمی سیاحت محدودلاشسا دا، توپلانتیلارین کرونا خسته‌لیگی‌نین اساس سببی اولدوغو بیلینیر. اربعین مرکزی قرارگاهی‌نین مسووللاریندان بیری اولان «حسن پلارک»، ایرانلی زوارلاری اربعین مراسیمی اوچون عراقا گؤندرمه‌یه حاضر اولدوغونو دئدی. بو مقام 20 میلیون آدامی قبول ائتمه‌یه حاضر اولدوقلارینی و مراسیمین لغو ائدیلمه‌سی و یا کئچیریلمه‌سی ایله باغلی هر هانسی بیر قراری اربعین مرکزی قرارگاهی‌نین مسوولیتینده اولدوغونو وورغولادی.
بو میقیاسدا بیر توپلانمالاردا خالقین ساغلیغی ایله علاقه‌‌‌لی اولاراق صحیه ناظرلیگی‌نین و کرونا میلّی قرارگاهی‌نین قرار وئرمه‌سی گره‌کیر، آنجاق اربعین مرکزی قرارگاهی هانسی حاقلا بئله بیر مسئله‌‌ده قرار وئره‌جکدیر.
داها اؤنجه، عوموم‌دونیا صحیه تشکیلاتی، آراشدیرما مقصدی ایله ایرانا بعضی «رمدسیویر» درمانی وئردیگینی آچیقلامیشدی. آنجاق سون هفته‌لرده بو درمان ایرانداکی قارا بازاردان چیخدی. ایندی صحیه ناظری‌نین معاونی و قیدا و درمان تشکیلاتینین باشقانی «محمدرضا شانه‌ساز»، قارا بازاردا یوخاری قیمتلرله ساتیلان «رمدسیویر» درمانی‌نین ساختا اولدوغونو سؤیله‌دی.
او؛ کلینیک سیناقی اوچون گتیریلن درمانلارین صحیه ناظرلیگی‌نین تدقیقات بؤلومونه وئریلدیگینی و قارا بازاردا مؤوجود اولان بوتون نومونه‌لرین قانونسوز و ساختا اولدوغونو ادعا ائدیر.
ایران حؤکومتینده‌کی فرقلی مسووللییتلر داشییان شخصلرین ضديتلی مؤوقئلری فرقیلی قرارلارین وئریلمه‌سینه سبب اولموشدور و بونلاردان بیری ده محدودیتلرین تطبیق ائدیلمه یولودور.
مثلا، اؤلکه‌نین ایداری و ایستیخدام تشکیلاتینین یئنیله‌مه معاونی، ایداره‌لرین باغلانماسینا دایر هر هانسی بیر شرحین اساسسیز اولدوغونو قئید ائده‌رک دئدی؛ ایداره‌لرین و ایش‌یئرلری‌نین باغلانماسی و محدودیتلرین قویولماسی ایله باغلی قرارلار کرونا ایله موباریزه اوزره میلی قرارگاهین مسوولیتیدیر و دیگر مقاملارین شرحی کئچئرسیزدیر.
تهرانداکی کرونانین وضعيتی پیسلشدیکجه مجلیس صحیه کمیسیونونون باشقانی، کرونا ویروسو ایله موباریزه اوچون مجلیسین ایش گونلری‌نین و ایش ساعتلری‌نین آزالماسینی تکلیف ائتدی.
"حسینعلی شهریاری" سئچکی دایره‌لرینده و خالقلا گؤروشده بیر چوخ حاللاردا فیزیکی مسافه‌‌نی قوروماقین مومکون اولمادیغینی سؤیله‌یه‌رک آرتیردی؛ سون گونلرده تدریس قارشیلیقی پول آلان موعلیملرین حقوقونو تعیین ائتمک اوچون سس وئرمه زامانیندا چوخ سایدا ملت وکیلی فیزیکی مسافه‌‌یی قورومادی.
تهرانداکی کرونانین وضعيتی البرز ایالتینه بیرباشا ائتکی ائدیر و بو ایالتده کرونا یئنیدن گوجلندیکدن سونرا البرز والیسی بیر هفته‌لیک محدودیتلرین اوزادیلاجاغینی اعلان ائتدی و ایالتده کرونالی اولان اینسانلارین سایی‌نین کسکین شکیلده آرتدیغینی سؤیله‌دی. او، وضعيتی کرونانین ایلک پیکی اولان فروردین آییندان اولدوقجا چتین اولدوغونو و خسته‌خانالارین کرونالی اینسانلاردان دولدوغونو دئدی.
عزیزالله شهبازی آیریجا البرزدا فؤوقلاده وضعيتین اولدوغونو قئید ائتدی و اینقیلاب کئشیکچیلری‌نین گلن هفته ایالتده بیر ساحه خسته‌خاناسی آچاجاغینی آچیقلادی.
دوغو آذربایجانین 12 شهرینده یاشانان قیرمیزی وضعيته توخونان تبریز طبّ علملری بیلیم‌یوردونون رئیسی، «محمدحسین صومی» دئدی؛ بو ایالتده هر گون تخمیناً 180 نفر خسته‌خانایا یئر‌لشدیریلیر و 150 نفر خسته‌خانادان چیخیر. نتیجه‌ده خسته‌خانالارا قبول اولونان خسته‌لرین موطلق سایی گونده 30 نفر آرتیر.
ایرانداکی کرونانین ایلک دالغاسیندا ویروسدان جدّی ائتکیلنن و وضعيتی سون درجه کریتیک اولان مازانداران ایالتی ایندی باشقا بیر بؤحرانلا قارشی قارشییادیر و بو ایالتین 22 شهریندن 12-سی قیرمیزی و نارینجی وضعيتده‌دیر. بو وضعيتده، بو ایالتده خسته‌لرین سایی‌نین گون‌به‌گون آرتماسی ایله والی یاردیمجیسی مازاندارانین شهر و شهرلر آراسی مئشه پارکلاری‌نین یئنیدن باغلاندیغینی آچیقلادی.
«مهدی رازجویان» سؤزلرینه گؤره، بو باغلانمالار قیرمیزی وضعيتده اولان شهرلر اوچون بو گون، 20 تیرده و دیگر شهرلر اوچون، 21 تیر تاریخیندن بری باشلایاجاق.
اؤتن ایل بهمن آیینین ایگیرمی‌سینده قم ایله عینی واختدا کرونا خسته‌لیگی‌نین تصدیق اولوندوغو مازاندارانین ان بؤیوک شهری اولان بابلدا، خسته‌لرین سایی 159 نفره چاتدی و شهرده‌کی بوتون خسته‌خانالار کرونا ایله علاقه‌‌‌لنمک زوروندا قالدی.
تخمیناً ایکی آیدیر قیرمیزی وضعيتده اولان خوزستاندا، ایالتین ساغلاملیق مرکزی‌نین مودورو 15 شهرین قیرمیزی وضعيتده، اوچ شهرین ایسه نارینجی وضعيتده اولدوغونو بیلدیردی.
«محمد علوی» ایالتده یولوخانلارین سایی‌نین آزالدیغینی، لاکین ایالتین اهالیسی‌نین 90 فایزیندا هله ده یاییلما و یولوخما ریسکی اولدوغونو و کرونا خسته‌لیگیگین یئنیدن آرتما ایمکانی‌نین اولدوغونو سؤیله‌دی.
صحیه ناظرلیگی‌نین سؤزچوسو «سیما سادات‌لاری»، هر گون اولدوغو کیمی اوزرینده اوینانمیش ایستاتیستیکایی آچیقلادی او بو مدتده 2262 نفره کرونا تشخیصی قویولدوغونو، اونلاردان 1455 نفری‌نین خسته‌خانایا یئر‌لشدیریلدیگینی و توپلام اولاراق دا 252720 نفرین یولوخدوغونو سؤیله‌دی. عینی زاماندا دیگر 142 خسته اؤلدو و ایراندا کرونادان قایناقلانان اؤلوم ساییسی‌نین توپلامی 12 مین 447 نفره چاتدی.
صحیّه ناظرلیگی‌نین سؤزچوسونون وئردیگی معلوماتا گؤره، حال حاضیردا خوزستان، هرمزگان، بوشهر، دوغو آذربایجان، کوردستان، باتی آذربایجان، کرمانشاه، خوراسان رضوی و ایلام ایالتلری قیرمیزی و تهران، اصفهان، مازندران، گلستان، البرز، کرمان، یزد، همدان و اردبیل، سیستان و بلوچیستان خبردارلیق وضعییتده‌دیر و بو گونه قدر اؤلکه‌ده یالنیز 1.922.501 کووید-19 تستی آلینمیشدیر.
یوروم یازماق