ایسلام جمهورییتی محکمه سؤزچوسو اوین حبسخاناسینین ایچریسیندن یاییلان ویدئولارا ایستیناد ائدهرک، بونونلا باغلی اولاراق ۶ نفرین کیملیگینین بللی ائدیلدیگینی و ۴ نفرین حربی ساوجیلیغا، ایکیسینین ایسه ساوجیلیغا چاغریلدیغینی و قالانلارا دا زامان ایچریسینده قارشیلیق وئریلهجهیینی بیلدیردی.
ذبیحالله خدائیان، ۹ شهریور ۱۴۰۰-جو ایل، چارشنبه آخشامی گونو، محکمه سؤزچوسونون ایلک مطبوعات کونفرانسیندا دئدی: "یاییملانان گؤرونتولرده گؤرونن صحنهلره گلینجه، بو قانونا ضدیر و هئچ بیر شکیلده قبول ائدیله بیلمز و ساوونولا بیلمز."
سون گونلرده باش ساوجی، مسئلهنی آراشدیرماق اوچون بیر قروپا تاپشیریق وئردی.
خدائیان دئدی: "بو تشکیلاتین بوتون زحمتکش هئیتینی بیر نئچه عسکرین پوزونتوسونا باغلامامالیییق. هر حالدا، هر بیر قشرده جزالاندیریلاجاق جینایتکارلار وار."
او ویدئولارین مونتاژ ائدیلمیش فورمادا یاییملانماسینا توخوناتاق دئدی: "بو فیلملر بیر بیرینین آردینجا یاییملاندی و اینسانلار هر گون بئله شئیلری گؤردویوموزو دوشونه بیلر، آما بو دوغرو دئییل؛ بو فیلملری یایان اینسانلار اؤنجهکی ایللردن و آیلاردان اولان فیلملری مونتاز ائتدیلر و بیر آرایا گتیردیلر و بئله حاللارین هر گون حبسخانالاردا باش وئردیگینی دوشونمک دوغرو دئییل."
بو یاخینلاردا "عدالت علی" آدلی قروپ اوین حبسخاناسینین کامئرالارینی هکلدی و حبسخانانین ایچیندن ویدئو یاییملادی. بو ویدئولاردا اوین حبسخاناسینین عسکرلری و چالیشان هئیتی طرفیندن محبوسلارا ایشگنجه وئریلمهسی و دؤیولمهسی حاللاری، بعضی محکوملارین اینتیحار جهدی و اوین حبسخاناسینین ایداری حیصهسیندهکی و عومومی بندلرینده وضعيتین کؤتو اولدوغونو گؤستردی.
📩 بو خبر حاقیندا داها چوخ بیلگینیز وارسا، لطفا بو ایمیل واسطهسی ایله بیزیمله ایلهتیشیمه کئچین:
📞 بو خبرین قونوسو ایله باغلی یئتکیلی شخصلرله ایلهتیشیمه کئچمک ایستهییرسینیزسه، لطفا ایرانین دؤرد بیر یانیندا یئر آلان یئتکیلیلرین لیستینه باخین: www.ostanwire.com
یوروم یازماق