ری شهری حبسخاناسینین قادین شؤبهسینده ساخلانیلان مدنی فعال شکیلا منفرد عادی جینایت محبوسلارینین یاراتدیغی تهلوکهیه اعتراض اولاراق آجلیق آکسییاسینا باشلاییب.
هرانا اینسان حاقلاری خبر آژانسی جوما آخشامی، ۱۲ اسفندده بو خبری آچیقلاییب و یازیب کی، خانیم منفرد بیر عادی جینایت قادین محبوس طرفیندن دؤیولمکله تهدید ائدیلیب.
هرانا بیلگیلی بیر قایناغا ایستناداً بیلدیریب: عومومی جینایتلرده محبوسلاردان بیری خانم منفردی کونسئروانین قاپاغی ایله هدهلهییب و اونو دؤیمک نيتینده اولوب. بو تهدیدلره گؤره دونن مصلحت سالونو و حبسخانانین باشقا قاپیلاری آچیلماییب.
شکیلا منفرد بو ایل ۲۳ بهمنده حبسخانادان سسلی مئساژ گؤندرهرک اؤلومله هدهلهدیگینی و حبسخانادا تهلوکهسیز اولمادیغینی بیلدیریب.
خانیم منفرد سس فایلیندا اؤلومله هدهلنمهسی ایله باغلی حبسخانا یئتکیلیلری قارشیسیندا دفعهلرله مسئلهنی دئدیگینی، لاکین اونو هدهلهینلرین جزالاندیریلماسی اوچون هئچ بیر تدبیر گؤرولمهدیگینی بیلدیریب.
بو محبوس مدنی فعال باشینا گلن هر بیر حادثهیه گؤره بیلا واسیطه حبسخانا مودیری، تهران ساوچیسی و تهران حبسخانالارینین باش مودیرینین سوروملو اولدوغونو دئییب .
۱۳۷۲-جی ایلده آنادان اولان شکیلا منفرد اؤتن ایلین شهریورینده ائودن چیخارکن تهراندا گوونلیک گوجلری طرفیندن حبس ائدیلیب و اینقیلاب کئشیکچیلرینین تهرانداکی تجریدخانالاریندان بیرینه کؤچورولوب.
او، اؤنجه تهران اینقیلاب محکمهسی طرفیندن "رژیمه قارشی تبلیغات فعالیتی و ایسلامین موقدسلیکلرینی تحقیر ائتمک" اتهامی ایله ۶ ایل حبس و اکینچیلیک جیهادیندا ۴ آی مجبوری امک جزاسینا محکوم ائدیلمیشدی، لاکین تهرانین ۳۶-جی تئمییز شؤبهسی طرفیندن بو جزا دؤرد ایل ایکی آی حبسه چئوریلدی.
۱۴۰۰-جو ایلین خرداد آییندا دا هرانا خبر آژانسی بو مدنی فعالین وارامیندهکی قرچک حبسخاناسیندا بیر سیرا عومومی جینایت محبوسلاری طرفیندن دؤیولدویونو بیلدیردی.
بو خبر آژانسی بونون "محبوسلاری آییرما ایلکهسینه عمل ائدیلمهمهسی" و ورامیندهکی قرچک حبسخاناسیندا سیاسی محبوسلارین عومومی جینایت محبوسلاریندان آیریلماماسی سببیندن باش وئردیگینی یازیب.
📩 بو خبر حاقیندا داها چوخ بیلگینیز وارسا، لطفا بو ایمیل واسطهسی ایله بیزیمله ایلهتیشیمه کئچین:
📞 بو خبرین قونوسو ایله باغلی یئتکیلی شخصلرله ایلهتیشیمه کئچمک ایستهییرسینیزسه، لطفا ایرانین دؤرد بیر یانیندا یئر آلان یئتکیلیلرین لیستینه باخین: www.ostanwire.com
از بخش پاسخگویی دیدن کنید
در این بخش ایران وایر میتوانید با مسوولان تماس بگیرید و کارزار خود را برای مشکلات مختلف راهاندازی کنید
یوروم یازماق