صحیه ناظرلیگیندهکی ایستاتیستیکادا اویناما سیاستی، ایالتلرین وضعيتینی اعلان ائتمک اوچون گئنیشلندیریلرکن، صحیه ناظرلیگینین اعلان ائتدیگی معیارلارا و ایالت صحیه ایشچیلرینین بیلدیردیینه گؤره قیرمیزی و یا نارینجی (خبردارلیق)، وضعيته صاحب ایالتلیر ناظرلیک سؤزچوسونون گوندهلیک آچیقلاماسیندا قصداً اعلان ائدیلمیر. صحیه ناظرینه دولایی بیر جاوابدا حسن روحانی، یئنیدن آچیلمایی مودافیه ائتدی و ایراندا گئنیش میقیاسلی باغلانمانین مومکون اولمادیغینی سؤیلهدی. روحانی کرونانین ایرانداکی ایکینجی دالغاسینین گئری قایتماسینا باخمایاراق کرونانین ایدارهائتمه سیاستینی مودافیه ائتدی و ایندیکی دورومدان پروتکللارا عمل ائتمهین دئدیگی، خالقی گوناهلاندیردی.
روحانینین بو سؤزلری، بیر نئچه گون اؤنجه صحیه ناظرینین، اینسانلارین دولانیشیقلارینی ساغلاملیقلارینا اوستونلوک وئرمهلرینی خواهش ائدنلری تنقید ائدن ایرادلارا جاواب اولاراق گؤرونور. حسن روحانی، میلّی کرونا قرارگاهینین ایجلاسیندا هئچ بیر اؤلکهنین آلتی آی اقتصادی فعالیتینی دایاندیرما ایمکانینین اولمادیغینی و اومومیتله ایرانین کوتلوی شکیلده باغلانماسینین مومکون اولمادیغینی سؤیلهدی. بو آرادا روحانی، بوتون میتینگلرین قبولائدیلمز اولدوغونو سؤیلهدی و صحیه ناظرلیگینی بیلیمیوردلارینا گیریش ایمتاهانی اوچون بیر پروبلئم گؤردوغو تقدیرده بیر چرچیوه قورماغا چاغیردی.
لاکین کرونانین ایکینجی دالغاسینین تهراندا یوکسهلیشی 16 و 24 ساعتلیق کرونا تاراما مرکزلرینین سایینی 56دان 90 مرکزه قالدیردی. بو مرکزلرده کرونا شوبههلی خستهلری دیگر خستهلردن آییراراق موعاینه اوچون بیر حکیمه موراجعت ائتمهلری ایستهنیلیر.
عادت-عنعنهلره گؤره یئنی مجلیس ایشه باشلادیغی ایلک هفتهلرینده علی خامنهای ایله گؤروشهجیی گؤزلهنیلیردی. آنجاق یئنی مجلیس عضولری بو گؤروشو ویدئو کنفرانسلا کئچیرهجکلر. مجلیسین شورالار کمیسیونو باشقانی «محمد صالح جوکار»، گؤروشون صاباح ویدئو کنفرانس شکلینده کئچیریلهجهیینی آچیقلادی.
بیلیمیوردلارینا گیریش ایمتاهانینین کئچیریلمهسی ایله باغلی ضديّتلی شرحلردن سونرا صحیه ناظری بو گون بیلیم ناظری و میلّی تحصیل اؤلچمه و سئچمه تشکیلاتینین مسووللاری ایله میلّی چاپدا اولان ایمتاهانلارین دورومو و واختی ایله باغلی قرار وئرهجهیینی آچیقلادی. بو ایمتاهانلارین 2 میلیوندان چوخ آدایین ایشتیراکی ایله بیر نئچه مرحلهده کئچیریلمهسی پلانلاشدیریلیر.
تهران شهر شوراسی مجلیسینین باشقانی، پایتختی کرونا خطریندن قوروماق اوچون اینسانلارین ایشبیرلیگی ائتمهلری و سیاحتلرینی دوردورمالاری شرطی ایله، تهراندا نوروز بایرامینا بنزر ایکی هفته مدتینده بیر تعطیلین تطبیق ائدیلمهسینی اؤنردی. اونا گؤره بعضی مسئلهلرین قانون و محدودیتلره احتییاخی واردیر و قانونوئریجیلیکده گوجلو بیر قونومدا اولان کرونا میلّی قرارگاهی بو مسئله بارهسینده قرار وئرمهلیدیر.
ایرانین گونئیینده ده کرونا اینسانلارین حیاتینی گرو توتماغا داوام ائدیر و ائتکیلی صحیه سیاستی اولمادیغی اوچون وضعيته نظارت ائتمکده ده دقیق بیر پئرسپئکتیو یوخدور. بوشهر طبّ علملری بیلیمیوردونون رئیسی سعید کشمیری، ایالتدهکی دوققوز شهرین سککیزینده قیرمیزی وضعيتین داوام ائتدیگینی سؤیلهیهرک، کرونا ایله علاقهلی محدودیتلرین داها بیر هفته اوزادیلدیغینی سؤیلهدی.
کهگیلویه و بویر احمد والیسینین سؤزلرینه گؤره، کرونا ویروسونون یاییلماسی سرعتلهنیر و ایالتده اؤلنلرین سایی گونو گوندن آرتماقدادیر. والی حسین کلانتری، خستهلیگین داها دا یاییلماسینین قارشیسینی آلماق اوچون محدودیتلرین بیر هفته داوام ائدهجهیینی سؤیلهدی.
ایلام ایالتیندهکی قیرمیزی وضعيت ایکینجی هفتهیه گیردی و ایلام اهالیسینین 90 فایزینین قیرمیزی بؤلگهده اولدوغونو نظره آلاراق، ایلام والیسی همین ایالتده محدودیتلرین بیر هفته داها اوزادیلاجاغینی آچیقلادی. بو آرادا، ایلام طبّ علملری بیلیمیودو، ایالتده طبّ چالیشانلاریندان 160 نفرین کرونا خستهلیگینه یولوخدوغونو آچیقلادی و ایلام طبّ علملری بیلیمیودونون رئیسی، مؤوجود گئدیشاتین داوام ائتمهسینی خستهلیگین ایدارهسینی مومکونسوز حالا گتیردیگینی بیلدیردی.
فارس والیسی بو ایالتده کرونا خستهلرین سایینین آرتماسی ایله علاقه دار اولاراق بئش دؤولت و ایکی خوصوصی خستهخانایا توپلام 818 نورمال یاتاق و 129 رئانیماسییا یاتاغی و خستهلیگی ساوانلار اوچون ایسه 60 یاتاغین آیریلدیغینی سؤیلهدی. فارس قان نقلی تشکیلاتینین باشقانی مسعود ترابی، بوتون قان قروپلاری رزرولرینده آزالما و خبردارلیق وضعییتده اولدوغونو بیلدیردی.
ایرانین گوزئیینده یئر آلان مازانداراندا، ایالتدهکی قیرمیزی شهرلرینین سایی 10 شهره چاتدی و بیر هفتهدن ده آز مدتده اؤرتولو خستهخانالارا موراجعت ائدن کرونا خستهلرین سایی گونده 300-دن 1000 نفره قدر آرتدی. اسفند و فروردین آیلاریندا مازانداراندا یاشانان کرونا فاجعهسینین تکرارلانماسی ایله علاقه دار ناراحاتلیقلارا گؤره، صحیه ناظری، بیرینجی معاونی ایرج حریرچینی دورومو یاخیندان اینجلهمهسی اوچون گؤرولندیردی.
صحیه ناظرلیگینین سؤزچوسو، یاخین زاماندا اردبیل ایالتینی، خبردارلیق وضعيتیندهکی بؤلگهلر آراسیندا دئییردی. ایالت مسووللارینین سؤزلرینه گؤره، بو ایالتده وضعيت قیرمیزیدیر و حاضیردا ایالت اهالیسینین 70 فایزیندان چوخو قیرمیزی بؤلگهلرده یاشاییر. اردبیل طبّ علملری بیلیمیوردونون رئیسی شهرام حبیبزاده حاضیرکی دورومو ایالتین خستهلیگین ایکینجی دالغاسینا قدم قویدوغونو گؤستردیگینی دئدی. ایالت قان نقلی تشکیلاتی کرونانی ساوان هم وطنلرین یئنی خستهلره کؤمک ائتمک اوچون قان باغیشلارینی آلماغا حاضر اولدوغونو آچیقلادی.
صحیه ناظرلیگینین بیلدیردیگینه گؤره قیرمیزی و نارینجی (خبردارلیق) اولمایان همدان ایالتینده، والی سعید شاهرخی خستهلرین سایینین دؤردده بیر آرتماسی و اؤلوم سببی ایله ایالتده وضعيتین الوئریشسیز اولدوغونو آچیقلادی. همدان، ملایر، تویسرکان، نهاوند و نارینجی باهار بؤلگهسی کیمی قیرمیزی بؤلگهلرده کرونانین داها چوخ یاییلماسی ایله بعضی ایش یئرلری و فعالیّتلر بو گوندن اعتباراً بیر هفته باغلاندی.
صحیه ناظرلیگینین سؤزچوسو «سیما ساداتلاری»، هر گون اولدوغو کیمی اوزرینده اوینانمیش ایستاتیستیکایی آچیقلادی او بو مدتده 2397 نفره کرونا تشخیصی قویولدوغونو، اونلاردان 1739 نفرینین خستهخانایا یئرلشدیریلدیگینی و توپلام اولاراق دا 255635 نفرین یولوخدوغونو سؤیلهدی. عینی زاماندا دیگر 188 خسته اؤلدو و ایراندا کرونادان قایناقلانان اؤلوم ساییسینین توپلامی 12 مین 635 نفره چاتدی.
صحیّه ناظرلیگینین سؤزچوسونون وئردیگی معلوماتا گؤره، حال حاضیردا خوزستاندوغو آذربایجان، رضوی خوراسان، گوزئی خوراسان و هرمزگان ایالتلری قیرمیزی و تهران، البرز، لرستان، خراسان جنوبی، کهگیلویه و بویراحمد، زنجان، اصفهان، مازندران، گلستان و ایلام خبردارلیق وضعییتدهدیر.
بوشهر، اردبیل و ایلام ایالتلری بو ایالتلرین طبّ چالیشانلارینا گؤره قیرمیزی وضعییتدهدیر. آنجاق صحیه ناظرلیگینین سؤزجوسونون بو ایالتلری قیرمیزی اولان بؤلگهلر آراسینا دئمهمهسی بللی دگیل. خبردارلیق وضعيتده اولان ایالتلر آراسیندا ایسه ندن اصفهان، فارس، باتی آذربایجان، کرمان، یزد، کوردستان، همدان و کرمانشاهدان خبر یوخدور؟ قیرمیزی وضعيتده اولان بیر ایالت (کوردستان، کرمانشاه و باتی آذربایجان) خبردارلیق (نارینجی) مرحلهسینه گیرمهدن درحال ساری و یا آغ مرحلهیه گیرمهلری مومکوندورمو؟ یوخسا اؤلکه مسووللارینین معين بیر ایالتدهکی خستهلیگین وضعيتی بارهده دئدیکلری او ایالتدهکی مسوولللارین دئدیگی ایله فرقلی اولا بیلرمی؟
از بخش پاسخگویی دیدن کنید
در این بخش ایران وایر میتوانید با مسوولان تماس بگیرید و کارزار خود را برای مشکلات مختلف راهاندازی کنید
یوروم یازماق