صحیه ناظرلیگی‌نین سؤزچوسو، بیر نئچه گوندور کی، ایالتلرین وضعیتینی آچیقلاییر، قیرمیزی و خبردارلیق وضعیتینده اولان ایالتلرین سایینی حقیقی سایدان آز اعلان ائدیر. صحیه ناظری بیر مکتوبدا بودجه ایسته‌مک و یا اؤلکه‌ده ایکینجی کرونا دالغاسینا سبب اولان سیاستی تنقید ائتمک عوضینه، یالتاقلیق ائدیر و رهبری تعریفله‌ییر و طبّ ایشچیلری‌نین رهبرین دوداقلارینا بیر تبسّوم گتیرمک اوچون چالیشدیقلارینی دئییر. بونا باخمایاراق تهران شهر شوراسی‌نین باشقانلیق هئیتی‌نین عضوو کرونا ساحه‌‌‌سینده سحو سیاستلرین دوامینین بو وضعیتی اورتایا چیخاردیغینی سؤیله‌دی.
بازار گونو ایرانداکی کرونا ایله باغلی خبرلری صحیه ناظری سعید نمکی‌نین، ایسلام جومهوریییتی رهبری علی خامنه‌ای‌یه، ایراندا کرونانین ایکینجی دالغاسی‌نین یوکسلدیگی بیر واختدا یازدیغی مکتوبو دقتدن کناردا ساخلاق اولماز. ایندیکی بؤحران شرایطینده بودجه‌نین طبّ سئکتورونا نییه آیریلمادیغینی سوروشماق عوضینه، بیلیمسل اولمایان مکتوبلا ایسلام جومهوریییتی‌نین رهبرینه یالتاقلیق ائدیر. کرونا ایله ساواشان بیر اؤلکه‌نین صحیه ناظری‌نین او اؤلکه‌نین رهبرینه یازدیغی معلوماتنامه‌ده، سولطانا نئجه باش اییلیر درسینی یاخشی آلدیغینی گؤره بیلیریز.
صحیه ناظرلیگی‌نین مسووللاری، کرونا خسته‌لیگیندن اؤلنلرین سایینداکی تحریفلره علاوه اولاراق، هانسی ایالتلرده وضعیتین قیرمیزی اولدوغونو دا دوز دئمیرلر. صحیه ناظرلیگی‌نین سؤزچوسونه گؤره؛ بو گون یالنیز ۴ ایالت یعنی خوزستان، رضوی خوراسان، مازانداران و باتی آذربایجان ایالتلری قیرمیزی وضعیتده‌دیر وتهران، فارس، کرمان، البرز، کهگیلویه و بویراحمد، گلستان، بوشهر، هرمزگان و دوغو آذربایجان اولماق اوزره ۹ ایالت ده خبردارلیق وضعیتینده‌دیر.
بیر سیرا دیگر ایالتلرین صحیه و سیاسی مسووللاری بو ایالتلرین قیرمیزی و یا خبردارلیق وضعیتلرینده اولدوغونو گؤسترن معلوماتلار وئریرلر، لاکین صحیه ناظرلییگنین سؤزچوسو آچیقلامالاریندا بونلارا توخونمور.
گوزئی خوراساندا توپلام ۱۱ شهردن ۷ سی قیرمیزی شهر، ۲ سی نارینجی شهر و ایکی شهر ساری وضعیته صاحبدیر و شهرلرین دموگرافیک قورولوشونا گؤره ایالت قیرمیزی وضعیتده‌دیر؛ لاکین صحیه ناظرلیگی‌نین معلوماتینا گؤره، ایالت حتی نارینجی وضعیتده بئله دئییل.
گلستان‌دا والی بوتون شهرلرین قیرمیزی وضعیته گلدیگینی و بئله‌لیکله ایالتین قیرمیزی و کریتیک وضعیته دوشدویونو آچیقلادی، لاکین صحیه ناظرلیگی‌نین سؤزچوسونون آچیقلاماسیندا گلستانین وضعیتی خبردارلیق اولاراق اعلان ائدیلدی.
صحیه ناظرلیگی، کرونانین یاییلماسی باخیمیندان تهران ایالتینی خبردارلیق وضعیتینده اولان ایالتلر ایچینده تقدیم ائدیر. ایرانین پایتختی تهراندا گونده‌لیک ۶۰۰ نفر کرونا خسته‌لیگیندن خسته‌خانایا یئر‌لشدیرلیر و بو دا عینی ناظرلیگین معیارلارینا گؤره تهرانین قیرمیزی وضعیته دوشدوغونو گؤستریر. گونده‌لیک نیسبتین کریترلرینه گؤره هر ۱۰۰.۰۰۰ نفردن ۳ نفری خسته‌خانایا یئرلشدیریلن بیر شهر قیرمیزی مرحله‌‌‌یه قدم قویوب دئمکدیر.
سیستان و بلوچیستاندا، گونده خسته‌خانایا یاتیریلان خسته‌لریین سایی اورتالاما ۲۰۰ نفردیر. بو ایالتین ۳ میلیون نفردن آز اهالیسی‌نین اولدوغونو نظره آلارساق، قیرمیزی مرحله‌‌‌یه چاتماق نیسبتیندن ان آز ایکی قات چوخدور.
تهران شهر شوراسی‌نین باشقانلیق هئیتی‌نین عضوو «زهرا نژادبهرام» ، تهراندا کرونانین ایکینجی دالغاسینا قدم قویدوغونو خبردار ائده‌رک، تهرانداکی خسته‌خانایا گونده‌لیک یئرلشدیریلن خسته‌لرین سایی‌نین ۶۰۰ نفردن چوخ اولدوغونو و اؤلنلرین سایی‌نین ۷۰ نفره یوکسلدیگینی بیلدیردی. شورا عضوونون سؤزلرینه گؤره، «گئت گلین چوخ اولدوغو یئرلرده ایجباری ماسکه تطبیق ائدیلمه‌سی» نین نئجه حیاتا کئچیریله‌جیی باره‌ده دقیق ایجرا مکانیزمی‌نین اولماماسی وضعیتی داها دا آغیرلاشدیردی. بو شهر شوراسی عضوونون سؤزلرینه گؤره، تهراندا ۱۰ میلیوندان چوخ اینسانین یاشادیغی شهر اهالیسی‌نین تقریباً ۷۵ فایزی هر گون چالیشماق اوچون ائوینی ترک ائدیر، آنجاق رسمی مقاملارا گؤره سانکی اؤلکه پست-کرونا وضعیتینده‌دیر. یئرلی سويّه‌‌ده ان کیچیک بیر قرارا بئله ایجازه وئریلمیر و بو دا جدّی بیر بؤحرانا سبب اولوبدور.
عینی زاماندا، هر گون حکیملر طرفیندن وئریلن اؤلوم سندلرینه گؤره حاضرلانان بهشت زاهرا ایستاتیستیکاسینین بیر نوسخه‌سی اؤزل اولاراق ایران‌وایرین الینه چاتیر. دونن تکجه تهراندا ۹۷ نفر (۶۶ ارکک و ۳۱ قادین) کرونا خسته‌لیگیندن دونیاسینی دگیشدی، بو دا تهراندا ۱ اسفندیدن ۲۲ تیر آراسیندا کرونادان اؤلنلرین سایینی ۶۶۴۵ نفر اولاراق گؤستریر. اونلاردان ۴۸۷۹ نفری‌نین بهشت زهرایا، ۱۷۶۶ نفرین ایسه ایالتین دیگر قبریستانلیقلاریندا و یا ایالت خاریجینده دفن ائدیلمه‌سی اوچون عائله‌‌‌لرینه تحویل وئریلمیشدیر.
ایرانین موختلیف ایالتلریندن گلن معلوماتلار کرونانین یاییلدیغینی گؤستریر. خسته‌لرین و اؤلولرین سایی آرتیر و مسووللار پئش پئشه تؤوصیه ائتمکده‌دیرلر.
مشهد طبّ علملری بیلیم‌یوردونون صحیه اوزره معاونی «مهدی قلیان» قئید ائتدی کی، سون هفته‌لرده ایالتده‌کی ۲۹ عدد هرطرفلی طبّی خیدمت مرکزلرینه موراجعت ائدن شوبهه‌لی و یاکرونالی اولان خسته‌لرین ساییسینین چوخ چوخ آرتدیغینی دئیه‌رک قئید ائتدی؛ سون هفته‌لرده بعضی مرکزلر ۶۰۰ ایله ۱۰۰۰ نفر آراسیندا خسته‌یه خیدمت ائتمیشدیر و بو خسته‌لرین اورتالاما ۵۰ فایزی کرونا خسته‌لیگینه یولوخان اینسانلاردان تشکیل تاپمیشدیر.
سیستان و بلوچیستاندا سون هفته‌لرده گونده‌لیک ۲۰۰ نفره یاخین یئنی کرونا خسته‌سی اورتایا چیخیر. زاهدان طبّ علملری بیلیم‌یوردونون موعالیجه ایشلری اوزره معاونی «قاسم میری»، سون ۲۴ ساعت عرضینده سیستان-بلوچیستان ایالتینده ۲۲۵ موثبت کرونا خسته‌سی‌نین اولدوغونو قئید ائده‌رک، بو ایالتده‌کی کرونا لابراتواریندا تستی موثبت چیخان خسته‌لری‌نین سایی‌نین آرتدیغینی ناراحات ائدیجی و جدّی اولدوغونو و بو ایالتده خسته‌خانالارین خسته قبول ائتمه کاپاسیته‌سی‌نین کریتیک وضعیته دایاندیغی بیلدیردی.
گؤنئی خوراسان والیسی «محمد صادق معماریان»، بو ایالتده‌کی خسته‌لرین سایی‌نین دورمادان آرتماسینا توخوناراق دئدی؛ ایالت شهرلری‌نین هئچ بیرینده آغ (آشاغی ریسکلی) وضعیت حاکم دگیل و بو ایالتین توپلام۱۱ شهریندن ۲ شهر ساری شرایطه، ۲ شهر نارینجی شرایطه و ۷ شهر قیرمیزی شرایطه صاحبدیر.
۱۰ اردیبهشتدن بری قیرمیزی وضعیتده اولان خوزستاندا ۱۱ تیردن اعتباراً خسته‌لیگین آزالماسی گؤزله‌نیلمکده‌دیر. لاکین اهواز جندی شاپور طبّ علملری بیلیم‌یوردو، گئدیشاتین کؤورک اولدوغونو و یئنیدن یوکسله بیله‌جه‌یینی خبردار ائتدی. «فرهاد ابول‌نژادیان»نین دئدیگینه گؤره، سون ۱۰ گونده خسته‌خانایا یئرلشدیریلن خسته‌لرین ساییندا ۳۵۰ آزالما واردیر و بو آزالما اهوازداکی تعیین ائدیلمیش آلتی کرونا خسته‌خانالاریندان بیری‌نین بوشالدیلماسینا سبب اولموشدور.
شهرلری قیرمیزی وضعیتده اولان گلستانین والیسی، کرونا زنجیری‌نین کسیلمه‌سی اوچون گلستانین بوتون بؤلگه‌لرینده محدودیتلرین بیر هفته داها جدّی شکیلده تطبیق اولوناجاغینی آچیقلادی. هادی حق‌شناسا گؤره، ایالتین دوغو شهرلرینده چوخ سایدا خسته یاشاییر، آنجاق بو بؤلگه‌لرده‌کی خسته‌خانالارین کاپاسیته‌سی تاماملانمیش و بودا خسته‌لره ایمکان ساغلاماغی چتین‌لشدیریر؛ لاکین گلستان طبّ علملری بیلیم‌یوردونون رئیسی عبدالرضا فاضل ، خسته‌لرین سایی‌نین آرتدیقجا ایالت داخیلینده‌کی خسته‌خانالار دولدوغونو و آرتیق یئنی خسته‌لری قبول ائتمه‌یین مومکونسوز اولادوغونو سؤیله‌دی.
شیراز طبّ علملری بیلیم‌یوردونو رئیسی «مهرزاد لطفی» فارسداکی کرونا خسته‌لری‌نین آرتماسینا توخوناراق دئدی؛ نورمال و خوصوصی یاتاقلارین آرتیریلماسی ایله خسته‌خانالارین بوتون ایمکانلاریندان ایستیفاده ائتمه‌یه چالیشیلیر. فارس ایالتینده‌کی خسته‌خانالارین حاضرکی گوجو ۸۱۸ نورمال یاتاق، ۱۲۹ خوصوصی یاتاق و ۶۰ یاتاق ایسه خسته‌لیگی ساوانلار اوچون آیریلمیشدیر.
زنجان والیسی‌نین معاونلریندن بیری اولان «خدابخش مرادی»، ایالتین قیرمیزی شهرلرینده محدودیتلرین داها بیر هفته اوزادیلدیغینی و ایالتین آرتیق خبردارلیق وضعیتینده اولدوغونو بیلدیردی. زنجان طبّ علملری بیلیم‌یوردونون رییسی «محمدرضا صائینی» ده زنجانداکی قیرمیزی وضعیته توخوناراق دئدی؛ سرولوژی تستلرین آراشدیرماسی گؤستریر کی، ایندییه قدر ایالت اهالیسی‌نین یالنیز ۱۱.۷ فایزی یعنی تخمیناً ۱۱۷.۰۰۰ نفر کروناویروس خسته‌لیگینه یولوخموشدور.
اردبیل والیسی‌نین معاونلریندن بیری اولان بهروز ندایی، ایالتده کرونا خسته‌لری‌نین و اؤلوملرین آرتماسی‌نین اوزوجو اولدوغونو سؤیله‌دی.
قزوین طبّ علملری بیلیم‌یوردونون رئیسی «پیمان نامدار»، ایالتده کرونا خسته‌لیگی‌نین کسکینلشمه‌سینه توخوناراق؛ خرداد تعطیل‌لریندن سونرا قزوین شهرینین یئنیدن قیرمیزی وضعیته چئوریلدیگینی و تاکیستانین نارینجی و ایالتین دیگر شهرلری‌نین ایسه ساری وضعیته چئوریلدیکلرینی آچقلادی.
سون اولاراق قئید ائتمک لازیمدیر کی، صحیه ناظرلیگی‌نین سؤزچوسو «سیما سادات‌لاری»، هر گون اولدوغو کیمی اوزرینده اوینانمیش ایستاتیستیکایی آچیقلادی او بو مدتده ۲۱۸۶ نفره کرونا تشخیصی قویولدوغونو، اونلاردان ۱۴۹۹ نفری‌نین خسته‌خانایا یئر‌لشدیریلدیگینی و توپلام اولاراق دا ۲۵۷۳۰۳ نفرین یولوخدوغونو سؤیله‌دی. عینی زاماندا دیگر ۱۹۴ خسته اؤلدو و ایراندا کرونادان قایناقلانان اؤلوم ساییسینین توپلامی ۱۲ مین ۸۲۹ نفره چاتدی.
از بخش پاسخگویی دیدن کنید
در این بخش ایران وایر می‌توانید با مسوولان تماس بگیرید و کارزار خود را برای مشکلات مختلف راه‌اندازی کنید
یوروم یازماق