ایراندا قیرمیزی وضعيتده اولان ایالتلرین تام اولاراق اعلان ائدیلمه‌مه‌سی سیاستی و کرونا خبردارلیغی داوام ائدیر. صحیه ناظرلیگی‌نین سؤزچوسو گونده‌لیک ایستاتیستیکا آچیقلاماسیندا اؤلکه‌نین ۹ قیرمیزی ایالتیندن ساده‌جه ۴ ایالتین آدینی وئردی. بو آرادا کوردستان طبّ علملری بیلیم‌یوردونون مقاملاری، سون هفته‌لرده ایالتده گؤرولنلرین کرونانین گؤزله‌نیلن اساس دالغاسی اولمادیغینی و اساس دالغادا دؤرد قات داها خسته و اؤلو اولاجاغینی سؤیله‌دی.
صحیه ناظرلیگی‌نین سؤزچوسو، هر گون اولدوغو کیمی، کرونایا یولوخان و گونده‌لیک اؤلولرین ایستاتیستیکاسینا علاوه اولاراق قیرمیزی و خبردارلیق وضعيتینده اولان ایالتلرین آدلارینی آچیقلادی. سؤزچونون دئدیگینه گؤره، خوزستان، رضوی خوراسان، باتی آذربایجان و مازانداران ایالتلری قیرمیزی وضعيتده‌دیر، تهران، فارس، کرمان، البرز، کهگیلویه و بویراحمد، گلستان، بوشهر، هرمزگان و دوغو آذربایجان ایالتلری ده خبردارلیق وضعيتینده‌دیر.
بونونلا بیرلیکده، ایلام طبّ علملری بیلیم‌یوردونون صحیه اوزره معاونینین دئدیگی کیمی، آچیقلانان ایستاتیستیکا اعتبارلی دگیل، چونکی صحیه ناظرلیگی‌نین اطلاعات سیستملری یئنیلنمیر و دقیق ایستاتیستیکا وئریلمیر و ایالتلرین وضعيتی سحو اعلان اولا بیلر.
صحیه ناظرلیگی‌نین قیرمیزی بؤلگه‌لری معين‌لشدیرمک اوچون، آچیقلادیغی معیارلارا اویغون اولاراق ایالت طبّ چالیشانلاری‌نین سؤزلرینه گؤره و گونده‌لیک خسته‌خانایا یئر‌لشدیرمه ایستاتیستیکاسینی نظرده آلاراق امینلیکله دئمک اولار کی، ایلام، کوردستان، گونئی خوراسان، بوشهر، هرمزگان، گلستان، قزوین، تهران و البرز ایالتلری ایندی قیرمیزی وضعیتده‌دیر.
هرمزگان طبّ علملری بیلیم یوردونون رئیسی حسین فرشیدی، والیلیک کیمی قرار وئرمه مرکزلرینه وئریلن تعلیماتا دایاناراق، هرمزگانداکی بوتون شهرلرین حال حاضیردا قیرمیزی وضعيتده اولدوغونو آچیقلادی. هرمزگان ایالتی‌نین سوسیال گوونلیک و موعالیجه تشکیلاتی‌نین مودیری‌نین سؤزلرینه گؤره، بو تشکیلاتین طبّ چالیشانلاری‌نین ۱۱۸ عضوو کرونا یولوخموشدور.
بوشهر کرونا قرارگاهی‌نین ایجلاسیندا صحیه ناظری‌نین معاونی قاسم جان‌بابایی، بوشهر خسته‌خانالاری‌نین رئانیماسییا شؤبه‌سینده‌کی کرونا خسته‌لری‌نین اوچده بیری‌نین گنج اولدوغونو قئید ائتدی. اونون دئدیگینه گؤره، خسته‌لرین سایی‌نین کریتیک اولدوغونون یانی‌سیرا ایندیکی وضعيتده مؤوجود ایمکاناتلار جاواب وئرمیر. بوشهر خسته‌خانالاریندا ونتیلاتور و اکسیژن جیهازلارینا و اؤزل خسته یاتاقلارینا احتیاج واردیر.
شیراز طبّ علملری بیلیم‌یوردونون رئیسی مهرزاد لطفی، فارس ایالتینده‌کی خسته‌خانالارین دولو اولدوغونو و کرونا خسته‌لرینه آیریلان یاتاقلارین تخمیناً ۷۰ فایزینین دولدوغونو وورغولایاراق، اؤزل خسته‌خانالاری دا کرونا قبول ائتمه دؤنگوسونه علاوه ائدیلمه‌لرینی ایسته‌دی.
تهراندا کرونا ایله موباریزه اوزره قرارگاهی‌نین رئیسی، نقلياتین محدودلاشدیریلماسی و ترافیک پلانینا یئنیدن باخیلماسی باره‌ده بیر امر گؤزله‌دیکلرینی قئید ائده‌رک، دئدی کی؛ کرونا ایله علاقه‌‌‌لی خسته‌خانا توللانتیلاری سببیندن بؤیوک‌شهرده یولوخوجو توللانتیلارین میقداری اوچ یاریم قات آرتاراق گونده ۲۰۰۰ توندان ۷۰۰۰ تونا قدر چاتمیشدیر.
کرونانین ایکینجی دالغاسی ایرانین ایالتلری‌نین بیر چوخونا ائتکی ائتدیگی بیر وضعيتده، موختلیف سويّه‌‌لرده بیلیم‌یوردلارینا گیریش ایمتاهانلارینا قاتیلاجاق آدایلارین وضعيتی ده معلوم دگیل. اؤنجه‌دن ۲۶ تیر و ۲-۳ مرداد دا کئچیریلمه‌سی پلانلانان دکترا و یوکسک لیسانس ایمتاهانلاری‌نین تاریخینین دونن گئجه بیر داها ائرتئلئندیگی آچیقلاندی.
بو گون، بو ایمتاهانلارین دکترا اوچون ۹ مرداد و یوکسک لیسانس اوچون ۱۶ و ۱۷ مرداد تاریخلرینده کئچیریله‌جیی آچیقلاندی. صحیه ناظری سعید نمکی ده معاونی علیرضا رئیسی‌یه مکتوب گؤندره‌رک پروتکل‌لارا عمل ائدیلمه‌سینی تامین ائتمک اوچون ایمتاهانلاردان اؤنجه صحیه ناظرلیگی‌نین نماینده‌لری‌نین ایمتاهان مرکزلرینی زیارت ائتمه‌سینی ایسته‌دی.
کوردستان بیلیم‌یوردونون صحیه اوزره معاونی خبردارلیق ائتدی کی، کرونا خسته‌لیگینه یولوخانلارین آزالماسی قیرمیزی خطّی کئچمک آنلامینا گلمیر. او آرتیردی کی، حال حاضیردا ایالتده خسته‌لرین و خسته‌خانایا یئر‌لشدیریلن خسته‌لرین سایی فروردین و اردیبهشت آیلارینا نیسبتاً اوچ قات چوخدور و سون گونلرده کرونا خسته‌لری‌نین سایی‌نین آزالماسینا باخمایاراق ایالتده وضعيت یئنه ده قیرمیزیدیر. دکتر قادری، ایالتده‌کی بعضی شهرلرین گلن هفته یئنی خسته‌لیک دالغالاری ایله قارشیلاشا بیله‌جه‌یینی آچیقلایاراق، سون هفته‌لرده ایالتده گؤرولنلرین کرونانین گؤزله‌نیلن اساس دالغاسی اولمادیغینی و اساس دالغادا دؤرد قات داها خسته و اؤلو اولاجاغینی سؤیله‌دی.
قزوین ایالتی‌نین اهالیسینی نظره آلاراق، سون ۲۴ ساعت عرضینده قزوین‌ده ۳۳ خسته‌نین خسته‌خانایا یئر‌لشدیریلمه‌سییله عملا بو ایالت قیرمیزی وضعيته گیرمیشدیر. والی یاردیمجیسی منوچهر حبیبی، کرونا خسته‌لیگیندن اؤلنلرین سایینی کئچن هفته ایله موقایسه‌‌ده بئش قات داها آرتدیغینی خبردار ائتدی. والی یاردیمجیسی‌نین سؤزلرینه گؤره، دونن گئجه همین ایالتده ۵ نفر کرونا خسته‌لیگیندن اؤلدو و ایندی ایالتده ۲۳۹ نفر کرونا خسته‌لیگی ایله خسته‌خانالارا یئر‌لشدیریلیب.
فارس ایالتی‌نین گونئیینده سون ۲۴ ساعت عرضینده ۵ نفر کرونا خسته‌لیگیندن اؤلدو. ایندی لارستان طبّ علملری کالجی‌نین رئیسی، لارستان، خنج و گراشین قیرمیزی وضعيتده اولدوغونا توخوناراق ۳۱ کرونا شوبهه‌لی خسته‌نین خسته‌خانالارا و لارستانداکی کرونایا آیریلان مرکزه یئر‌لشدیریلدیگینی و خسته‌خانا یاتاقلاری‌نین ۱۰۰ فایز دولدوغونو سؤیله‌دی.
ایرانین گوزئیینده، ۱۴ شهری‌نین هامیسی قیرمیزی وضعيتده اولان گلستان ایالتینده، عبدالرضا فاضل گلستان طبّ علملری بیلیم‌یوردونون رئیسی‌نین سؤزلرینه گؤره، دونن گئجه ۲۲ نفر کرونادان اؤلدو. دکتر فاضل، حال حاضردا گلستان شهرینده ۶۸۳ نفرین کرونا خسته‌لیگیندن خسته‌خانایا یئر‌لشدیریلدیگینی، ۴۴ نفرین وضعيتی‌نین آغیر اولدوغونو و ایالتده خسته‌خانا یاتاقلاری‌نین، اکسیژن گئنئراتورلاری و سی‌تی‌اسکن چاتیشمازلیغی اولدوغونو دیله گتیردی.
سون ۴ آیدا ایکینجی دفعه کرونانین کریتیک مرحله‌‌‌سینه گیرن مازانداران ایالتی‌نین بوتون شهرلری قیرمیزی وضعيتده‌دیر. دونن مازانداران و بابل طبّ علملری بیلیم‌یوردلاری‌نین آچیقلادیغی سون ایستاتیستیک معلوماتلارا گؤره، کرونا خسته‌لیگی اولان مینه یاخین خسته حال حاضیردا بو ایکی خسته‌خانانین احاطه‌‌‌سینده اولان خسته‌خانالاردا موعالیجه اولونور.
گونئی خوراسان‌دا قبول ائدیلن کرونا خسته‌لرین سایی فروردین آیی ایله موقایسه‌‌ده ایکی قات و رئانیماسییا شؤبه‌لری‌نین سایی دؤرد-بئش قات آرتمیشدیر. بیرجندده‌کی ولیعصر خسته‌خاناسی‌نین رئیسی علیرضا محمودی‌راد، بو ایستاتیستیکایا استناد ائده‌رک، هفته سونو ۱۳ یاتاقلیق یئنی بیر آی‌سی‌یونون ایشه سالینماسی اوچون چالیشدیقلارینی سؤیله‌دی. ایالتین کرونا ایله موباریزه اوزره قرارگاهینا گؤره، گونئی خوراسانداکی ۱۱ شهردن،۲ شهری ساری و ۲ شهرین اهالیسنین ۹۰ فایزینین نارینجی وضعيتده (یوکسک ریسکلی) و 7 شهر ایسه قیرمیزی (چوخ یوکسک) وضعيته‌دیر.
ایلام طبّ علملری بیلیم‌یوردونون صحیه اوزره معاونی جمیل صادقی‌فر، بو ایالتده خسته‌لرین سایی‌نین هله ده چوخ اولدوغونو و قیرمیزی وضعيتین داوام ائتدیگینی و سون 2 هفته‌ده خسته‌خانایا یئر‌لشدیرمه سایی‌نین ۱۴۰ ایله ۱۵۰ آراسیندا اولدوغونو و خسته ساییسی‌نین آزالمادیغینی سؤیله‌دی. او آرتیردی کی ایالتین قیرمیزی وضعيتدن چیخدیغینی اعلان ائتمک دوغرو دگیل.
بوشهرده، طبّ علملری بیلیم‌یوردونون رئیسی، سون گونلرده بو ایالتده کرونا خسته‌لیگی‌نین آرتیمی‌نین دایاندیغینی و آزالدیغینی قئید ائده‌رک، ۱۳ خرداددا ۲۰۰۰ نفر خسته‌نین سایی بوگون ۶۷۰۰ نفره و اؤلولرین سایی۱۳اؤلومدن ۱۶۲ اؤلومه چاتمیشدیر و بو دا بوشهر ایالتی‌نین هله ده قیرمیزی وضعيتده اولدوغونو گؤستریر.
سون اولاراق قئید ائتمک لازیمدیر کی، صحیه ناظرلیگی‌نین سؤزچوسو «سیما سادات‌لاری»، هر گون اولدوغو کیمی اوزرینده اوینانمیش ایستاتیستیکایی آچیقلادی او بو مدتده ۲۳۴۹ نفره کرونا تشخیصی قویولدوغونو، اونلاردان ۱۵۸۱ نفری‌نین خسته‌خانایا یئر‌لشدیریلدیگینی و توپلام اولاراق دا ۲۵۹۶۵۲ نفرین یولوخدوغونو سؤیله‌دی. عینی زاماندا دیگر ۲۰۳ خسته اؤلدو و ایراندا کرونادان قایناقلانان اؤلوم ساییسی‌نین توپلامی ۱۳ مین ۶۵۲ نفره چاتدی.
یوروم یازماق