صحیه ناظرلیگینین سؤزچوسونون دئدیگینه گؤره، اؤلکهنین 26 ایالتی کرونا باخیمیندان قیرمیزی و خبردارلیق وضعیتیندهدیر. عینی زاماندا، مسووللار محرم ماتم مراسیملرینین هوسله کئچیریلمهسینی وورغولاییر و ساغلاملیق پروتکلونو حاضرلادیقلارینی اعلان ائتدیلر. بونونلا بیرلیکده صحیه ناظرلیگینین معاونی دئییر کی، بو مراسیمین کئچیریلمه قایداسی ایله باغلی هله هئچ بیر قرار وئریلمهییب و ناظرلیگین قطعی فیکری بودور کی، محرمده ایزدیحاملی مراسیم کئچیرمک قاداغاندیر؛ خوصوصیله صحیه ناظرلیگی قاپالی موحیطلرده کئچیریلن مراسیملره جدی و قطعی شکیلده قارشیدیر.
صحیه ناظرلیگینین موعالیجه ایشلری اوزره معاونی «قاسم جانبابایی»، کرونا خستهلیگینین باشلانغیجیندا تهراندا آلتی و یا یئددی خستهخانانین فعالیت گؤستردیگینه توخونارق دئدی کی، ایندی میندن چوخ خستهسی اولان اؤزل سئکتوردا بیر خستهخانا دا کرونا خستهلرینه خیدمت گؤستریر و عمومیتله، اؤلکهدکی بوتون خستهخانالارین کرونا بؤلوملری اولمالیدیر. عینی زاماندا، هر ایالتده ایکی-اوچ کرونا خستهخانانین اولدوغونو و اؤلکهده توپلام 200 خستهخانانین کرونا خستهلرینه خیدمت گؤستردیگینی علاوه ائتدی.
بو گون صحیه ناظرلیگی محرم مراسیمینین کئچیریلمهسی اوچون پروتکل حاضرلادیغینی اعلان ائتسه ده، «قدیر» و «قوربان» بایراملاری ایله باغلی مسئله هله ده موذاکیره اولونور. مراسیمین نئجه کئچیریلهجیی ایله باغلی هله هئچ بیر قرار وئریلمهدیگینی سؤیلهین صحیه ناظرینین معاونی «علیرضا رئیسی»، بیر مراسیم کئچیریلهجیی تقدیرده اؤنجهکی ایللر کیمی اولمایاجاغینی و اولدوقجا محدود اولاجاغینی سؤیلهدی.
او وورغولادی: «صحیه ناظرلیگینین قطعی فیکری بودور کی، محرمده ایزدیحاملی مراسیملرین کئچیریلمهسی قاداغاندیر؛ خوصوصیله صحیه ناظرلیگی قاپالی موحیطلرده کئچیریلن مراسیملره جدی و قطعی شکیلده قارشیدیر.»
رئیسی، بیلیمیوردونا گیریش ایمتاهانی و محرم مراسیملری کئچیرهرک کرونا خستهلیگینین سایینین 60فایز آرتاجاغی بارهده دقیق بیر جاواب وئرمهدی و قئید ائتدی کی، واجیب اولان مراسیملرین کئچیریلمهسی و اساسلاندیغی مدللشدیرمه متدونون اؤنگؤرولمهسیدیر.
بو واخت، کرونا ایله موباریزه اوزره میلی قرارگاهین معلومات کومیتهسی محرم اوچون ساغلاملیق پروتکلونو نشر ائتدی. بیرینجی پاراگرافدا قئید اولونور کی، معین گونلرده و محدود ساعتلاردا قاپالی مکانلاردا و ایالت چالیشما قروپونون ایستیی ایله مووافیق اولاراق، ساغلاملیق و ایدارهائتمه شرایطی اولان مسجیدلرده، حسینیهلرده و تکایادا کوتلوی یاس مراسیملرینین کئچیریلمهسی اوچون بیر مانع یوخدور.
صحیه ناظری سعید نمکی، ایرانین گئنیش ایقلیم شرایطینده، ایالتلرده هر هانسی بیر خستهلیک مدلینین عینی درجهده ديَرلندیریله بیلمهیهجهیینی قئید ائدهرک، هر ایالتده کولتورل، اقتصادی، سوسیال و صحیه ایله علاقهلی رئاللیقلارا سؤیکندیگینی سؤیلهدی و فرقلی ایدارهائتمه داورانیشلارین اولدوغونو دئدی.
محرم مراسیمینه گلینجه، صحیه ناظری بو ایل مراسیمین ائله بیر شکیلده کئچیریلمهسینین لازیم اولدوغونو سؤیلهدی و علاوه ائتدی کی، ساغلاملیق بؤیوک بیر دینی تؤوصیه اولاراق نظره آلینمالی و اینسانلار ایمام حسینین یاسینا حؤرمت ائتمهلیدیلر.
کرونا واکسهنینه گلینجه، سعید نمکی واکسنین اؤلکهنین هر یئرینده آراشدیریلدیغینی و هئچ واخت یالان دانیشمادیغینی و 90فایز امین اولمادیغی بیر شئیین مومکونلویو بارهده اینسانلارا بئله معلومات وئرمهدیگینی سؤیلهدی. او دئدی کی، ایران واکسن اورتیمی باخیمیندان دونیادا بیر چوخ ادعاچیدان گئری قالمامیشدیر.
ایسلامی مشورت مجلیسینین باشقانی ایسلام جمهورییتی رهبرینه گؤندردیگی مکتوبدا، مجلیسین اوچ کمیسیونونون باشقانلارینی میلی کرونا قرارگاهینا عضو اولماغی امر ائتمهسینی ایستهدی. «محمد باقر قالیباف» «صحیه»، «تحصیل» و «سوسیال» کمیسیونلارینین باشقانلارینی بیلیمیوردونا گیریش ایمتاهانلارینین کئچیریلمهمهسی بارهده گؤروشلرینی بیلدیرمک اوچون بو قرارقاهدا عضو اولمالارینی ایستهدی.
صحیه ناظرلیگینین معاونینین موشاویری، اؤلکهده کرونانین یاییلماسی مئیلینین داوام ائتمهسی ایله باغلی دقیق بیر منظرهنین اولمادیغینی وورغولایاراق، 1399-جو ایلده بیلیمیوردونا گیریش ایمتاهانی اولماقلا عومومتحصیل ایمتاهانلارینین هئچ بیرینین تاخیره آلینمایاجاغی و یا لغو اولمایاجاغینی سؤیلهدی.
«حسین قنبری»نین سؤزلرینه گؤره، بیلیمیوردونا گیریش ایمتاهانینین تاخیره آلینماسی سعیلری عائلهلره و آدایلارا تضییق و ایسترس یارادیر، و بونون ایسترسی کرونا خستهلیگینه یولوخما ناراحاتلیغیندان داها چوخدور.
تهرانداکی کرونا عملیاتینین فرماندهی، پایتختین چتین و کؤورک وضعیتینه کرونانین یاییلماسی باخیمیندان توخوناراق، تهرانداکی بوتون ییغینجاق و سرگیلرین ریسکلی و قاداغان اولدوغونو و تهران کرونا قرارگاهینین تطبیق ائتدیگی محدودیتلر ان آزی گلن هفتهنین سونونا قدر قالاجاق دئدی.
24 ساعت عرضینده تهران خستهخانالاریندا توپلام 684 یئنی خستهنین قبولونا توخونان دکتر علیرضا زالی، بو خستهلرین 124 نفرینین شهر خستهخانالارینین اؤزل باخیم بؤلوملرینده قبول ائدیلدیگینی سؤیلهدی.
خوزستان ایالتینین اهواز طبّ علملری بیلیمیوردونون مودیری «فرهاد ابولنژادیان»، دئدیگینه گؤره، ایکی آیدان چوخدور قیرمیزی وضعيتی یاشایان خوزستان ایالتی قیرمیزی وضعيتدن چیخمیشدیر و وضعيتی بیر درجه یاخشیلاشاراق حال حاضیردا خبردارلیق وضعيتیندهدیر.
همدان طبّ علملری بیلیمیوردونون موعالیجه ایشلری اوزره معاونی، نفس دارلیغی علامتلری و کرونا خستهلیگی شوبههسی اولان 400نفره یاخین خستهنین هر گون ایالت خستهخانالارینین تعجیلی یاردیم شؤبهسینه باش چکدیگینی و بونلارین 100 ایله 120 نفرینین آراسیندا خستهخانایا یئرلشدیریلدیگینی قئید ائدهرک، حاضردا 575 کرونا خستهسینین همدان ایالتیندهکی خستهخانالارا یئرلشدیریلدیگینی سؤیلهدی.
ابراهیم جلیلینین سؤزلرینه گؤره، بو گونه قدر ایالتده 36 حکیم، 185 طبّ باجیسی و 64 دیگر صحیه و خیدمت چالیشانی کرونا خستهلیگینه یولوخموشدور.
اراک طبّ علملری بیلیمیوردونون رئیسی، دونن گئجه مرکزی ایالتینده 218 یئنی حادثهنین آشکارلاندیغینی قئید ائدهرک، بو خستهلرین 32 نفرینین خستهخانایا قالدیریلدیغینی، 3 نفرین ده عینی مدتده اؤلدویونو، ایالتدهکی کرونا اؤلوملرینین سایینی 266 نفره چاتدیردیغینی بیلدیردی.
گوندهلیک آچیقلاماسیندا اؤلکهنین 26 ایالتینین قیرمیزی و یا خبردارلیق وضعیتینده اولدوغونا دقت چکن صحیه ناظرلیگینین سؤزچوسو، خستهلیگین ایلک باشلاماسیندان سونرا ایلک دفعه اؤلکهنین ان سیخ و ایشگوزار ایالتی اولاارق بیلینن تهرانین خستهلرین سایی آرتماقلا قیرمیزی وضعیته چئوریلدیگینی سؤیلهدی. او اؤلکهده گوندهلیک خستهخانایا یئرلشدیرمه اسفند آیینداکی خستهلیگین پیک نؤقطهسینه یاخینلاشیر دئدی.
«سیما سادات سالاری»، علاوه ائتدی کی، اؤلکهده و دونیادا کرونا خستهلیگینین وضعیتی گئتدیکجه آرتیر و ناراحات ائدیجی اولور.
صحیه ناظرلیگینین سؤزچوسو «سیما سادات سالاری»، وئردیگی راپوردا کئچن گونلر کیمی، تهران، اردبیل، اصفهان، لرستان، البرز، دوغو آذربایجان، ایلام، رضوی خوراسان، قوزئی خوراسان ، گلستان، مازانداران، کرمان، سمنان، هرمزگان و فارس ایالتلرینین قیرمیزی وضعیتده و باتی آذربایجان، خوزستان، بوشهر، چهارمحال و بختیاری، زنگان، همدان، کهگیلویه و بویراحمد، مرکزی، یزد، گیلان و قوم ایالتلرینین ده خبردارلیق وضعیتینده اولدوغونو بیلدیردی.
سون گونلرده وورغولادیغیمیز کیمی صحیه ناظرلیگینین و بیلیمیوردلارینین یایدیغی معلومات و استانداردلارا اساساً، گونئی خوراسان، سیستان و بلوچیستان، قزوین، اردبیل، همدان، بوشهر، هرمزگان، اصفهان و مرکزی ایالتلری خبردارلیق دئییل بلکه قیرمیزی وضعیتده و کرمانشاه، ، کوردستان ایالتلری ده خبردارلیق وضعیتدهدیر.
صحیه ناظرلیگینین سؤزچوسونون 4 مرداد دا آچیقلادیغی ایستاتیستیکا، بو مدتده 2 مین 677 نفره کرونا تشخیصی قویولدوغونو، اونلاردان 1687 نفرینین خستهخانایا یئرلشدیریلدیگینی و توپلام اولاراق دا 296 مین 273 نفرین یولوخدوغونو سؤیلهدی. عینی زاماندا دیگر 235 خسته اؤلدو و ایراندا کرونادان قایناقلانان اؤلوم ساییسینین توپلامی 16 مین 147 نفره چاتدی.
یوروم یازماق