اهواز طبّ علملری بیلیم‌یوردونون رییسی سون اوچ هفته‌ده بیر چوخ کرونا خسته‌نین خسته‌خانایا یاتیریلماسیندان ۲۴ ساعت کئچمه‌دن اؤلدویونو آچیقلادی.
بو واخت، میلی کرونا قرارگاهی، خوزیستان یئرلی مقاملاری و خسته‌خانا رییسلری‌نین ایکی هفته‌لیک بیر قرنطینه ایسته‌مه‌سینه باخمایاراق خوزیستانین باغلانیلماسینا راضیلیق وئرمه‌دی.
خوزیستانین یئنی والیسی قاسم سلیمانی دشتکی ده ایسنا خبر آژانسینا وئردیگی موصاحیبه‌سینده دئدی: "خوزیستاندا گونده‌لیک اورتالاما ۲ مین موثبت کرونا تستی قئید اولونور، لاکین خوزیستاندا ایکی هفته‌لیک تعطیل هله‌لیک گوندمده دئییل."
حال حاضردا خوزیستان ایالتینده اؤزل شرطلر مؤوجوددور و بو ایالتین والیسی‌نین آچیقلادیغی کیمی، ایکی هفته ایچینده خوزیستانین گیریش و چیخیشلارینا داها گوجلو نظارت و باغلانما اِحتیمالی وار.
تلوزیون ایله بیر دانیشیغا قاتیلان اهواز طبّ علملری بیلیم‌یوردونون رییسی فرهاد ابول‌نژادیان، ۲۰ بهمندن ۱۲ ایسفند تاریخلرینده خوزیستاندا کرونا موعاینه‌‌سینده خسته‌لرین ۷۰ فایزی‌نین تعجیلی یاردیم اوتاغینا گیردیکدن درحال سونرا اینتوبه اولدوغونو دئدی و بعضیلری‌نین ده تعجیلی یاردیم اوتاغینا چاتمادان اؤلدویونو بیلدیردی.
جناب ابول‌نژادیانا گؤره، آغیر خسته‌لرین اوچده بیری خوزیستان خسته‌خانالاریندا ۲۴ ساعتدان آز داوام ائدیر و خسته‌خانایا یئر‌لشدیریلدیکدن سونرا اؤلور. او بو رقملری "چوخ ناراحات ائدیجی" آدلاندیردی و دئدی: "بو، کرونا خسته‌لرین خسته‌خانالارا گئج گلدیگینی گؤستریر."
ایرانداکی مقاملار و مئدیا سون گونلرده "خسته‌خانا فوبییاسی" ایفاده‌سینی وورغولایاراق، کرونا خسته‌لرین اؤز سهلاًکارلیغی و گئج خسته‌خانایا قالدیریلدیغی اوچون اؤلدویونو وورغولادی.
سون گونلرده اهوازین بؤیوک خسته‌خانالاری‌نین رییسلری خسته‌خانالارین توتومونون دولو اولدوغونو، آی‌سی‌یو یاتاقلاری‌نین دولو اولدوغونو و بو خسته‌خانالارداکی دورومون قیرمیزی اولدوغونو آچیقلادیلار.
اهواز طبّ علملری بیلیم‌یوردونون رییسی دونن اهواز خسته‌خانالارینا باشووران خسته‌لرین سایی‌نین آرتماسی سببییله "ونتیلاتور" و اکسیژن جیهازلاری‌نین چاتیشمازلیغینی بیلدیردی.
خوزیستان ملت‌و‌کیللری مجلیسی‌نین باشقانی دا کروناداکی اؤزل دوروما گؤره بو ایالته طبّی تجهیزات و ساغلیق چالیشانلاری‌نین گؤندریلمه‌سینی طلب ائتدی. "کریم حسینی"، خوزیستانداکی "کرونانین اؤزل دورومونون" اعلانینا توخوناراق، حؤکومتین و ناظرلیکلرین خسته‌خانا یاتاقلاری، ساغلیق چالیشانی، خسته‌خانالار اوچون لازیملی آوادانلیقلار دا داخیل اولماقلا یاردیملارینی خوزیستانا گؤندرمه‌لرینی سؤیله‌دی.
بو آچیقلامالار ایسلام جمهوریییتی جمهورباشقانی‌نین علم و تکنولوژی اوزره یاردیمجیسی سورنا ستاری‌نین، سوریه صحیه ناظری حسن الفباش ایله گؤروشونده "سوریه‌یه ونتیلاتور و سونی تنفوس جیهازی ایخراج ائتمکله یاناشی، ایرانین سوریه ایله درمان و طبی آوادانلیق تداروکو و لازیمی تعلیملرین وئریلمه‌سی کیمی ساحه‌‌‌لرده ایشبیرلیگینه حاضردیر." دئدیگی بیر زامان وئریلیب.
📩 بو خبر حاقیندا داها چوخ بیلگینیز وارسا، لطفا بو ایمیل واسطه‌سی ایله بیزیمله ایله‌تیشیمه کئچین:
📞 بو خبرین قونوسو ایله باغلی مسوول شخصلرله ایله‌تیشیمه کئچمک ایسته‌ییرسینیزسه، لطفا ایرانین دؤرد بیر یانیندا یئر آلان مسووللارین لیستینه باخین: www.ostanwire.com
از بخش پاسخگویی دیدن کنید
در این بخش ایران وایر می‌توانید با مسوولان تماس بگیرید و کارزار خود را برای مشکلات مختلف راه‌اندازی کنید
یوروم یازماق