İnsan haqları mənbələrinin verdiyi məlumata görə, İranın dini azlıqlarına qarşı təzyiqlərin davamı olaraq, 7 xristian dinini qəbul edən vətəndaş Əhvaz İnqilab Məhkəməsi tərəfindən ümumilikdə 29 il 9 ay həbs cəzasına məhkum edilib.
“Həmid Əfzəli”, “Nəsrullah Musəvi”, “Bijən Quluzadə”, “İman Salehi”, “Zəhrab Şəhbazi” və kimliyi məlum olmayan digər iki vətəndaş Əhvaz İnqilab məhkəməsində mühakimə olunan və həbsə məhkum edilən xristianlar arasındadır.
Harana İnsan Haqları saytının məlumatına görə, Həmid Əfzəli 10 il, Nəsrullah Musəvi, Bijən Quluzadə və İman Salehi hər biri 5 il, Zəhrab Şəhbazi isə 9 ay müddətinə azadlıqdan məhrum edilib. Bu hesabatda o da bildirilir ki, kimliyi məlum olmayan digər iki xristian dinini qəbul edən vətəndaşların hər birinə 2 il həbs cəzası verilib.
İran qanunlarına görə, xristianların dini azlıq kimi tanınmasına baxmayaraq, təhlükəsizlik aparatları müsəlmanların xristianlığı qəbul etməsi məsələsini xüsusi həssaslıqla izləyir və bu sahədə fəallarla kötü rəftar edir.
İslam Respublikası xristianlığı qəbul edənlərlə yanaşı, İranda bəhailər, Qonabadi dərvişləri və Yarsanlar kimi digər dini azlıqları da sıxışdırır və onların ardıcıllarını ədalətsiz hökmlərlə həbs edir.
Şərhlər