ایلامین سعادت شهر آدلی لیسهسینین ۱۳ یاشلی بیر اؤیرنجیسی اؤزونو چوخقاتلی بینادان آتاراق اینتیحار ائدیب و حیاتینا سون قویوب.
تابناک سایتینین چارشنبه آخشامی، ۱۳ اردیبهشتده یایدیغی بیلگیلره گؤره، مسئله بو اؤیرنجینین و داها اوچ دوستونون شولوقلوغونا گؤره والیدئینلرینین اوخولا چاغیریلماسی اولوب.
والیدئینلری اوخولا گئدیب ائوه قاییتدیقدان سونرا آتاسی طرفیندن جزالاندیریلان اؤیرنجینین اؤزونو اوتاغینین پنجرهسیندن آتماسینا سبب اولوب.
بو ایلاملی اؤیرنجینین اینتیحار سونوجوندا اؤلمهسی ایلام ایالتینین سانال اورتامدا گئنیش تپکی چکیب و بعضی قوللانیجیلار اونون اوخولدا جزالاندیریلماسیندان دانیشیبلار.
آنجاق ایلام ائیتیم مودیری حجت رشیدی اوخولدا اؤیرنجیلرین جزالاندیریلماسی مسئلهسینی تکذیب ائدهرک دئییب: اؤلن ایلاملی اؤیرنجینین اوخول و والیدئینلری طرفیندن جزالاندیریلماسی و قووولماسی دوغرو دئییل و اوخولون گؤردویو تک تدبیر اونون عائلهسینه زنگ ائتمک اولوب.
حجت رشیدی ادعا ائتدی: والیدئینلری اؤولادلارینین ائیتیم دورومونو اؤیرنمهیه چاغیرماق اوخوللاردا بوتون اؤیرنجیلر اوچون عادی بیر تجروبهدیر و بونونلا باغلی اولاراق اوخوللار والیدئینلره اؤولادلارینین اوخوللاردا، او جوملهدن ائیتیم دورومو بارهده عائلهلره بیلگی وئرمهیه بورجلودورلار.
ائیتیم ناظرلیگی ایران اوخوللاریندا فیزیکی جزانین لغو ائدیلدیگینی ادعا ائدیر؛ آنجاق ثبوتلار گؤستریر کی، بیر چوخ ایران مکتبلرینده اوشاقلار هله ده فیزیکی جزایا معروض قالیرلار و اوشاقلارا قارشی روحی جزا و شیفاهی تحقیرلرین ایستاتیستیکاسی یوکسکدیر.
سون هفتهلر سوسیال شبکهلرده بیر مکتب مودیرینین اؤیرنجیلرین ساچلارینی قیرخدیغینی عکس ائتدیرن ویدئو یاییلیب. بیر نئچه گون اؤنجه ده بیر آستارالی اؤیرنجینین مکتبده دؤیولمهسی ایله باغلی ویدئو یاییلیب.
از بخش پاسخگویی دیدن کنید
در این بخش ایران وایر میتوانید با مسوولان تماس بگیرید و کارزار خود را برای مشکلات مختلف راهاندازی کنید
یوروم یازماق