ایران پریمئیر فوتبول لیگینین تشکیلاتی اؤنجهدن تعیین ائدیلمیش جدوله گؤره پرئمیئر لیگ یاریشلاریندا ایشتیراک ائتمهلی اولدوغونو استقلال کلوبونا بیلدیردی.
بو قرار ائله بیر حالدا وئریلمیش کی، ایکی کلوبون یعنی استقلال و فولاد خوزستانین، توپلام 15-دن چوخ کروناویروسا یولوخان اویونچوسو واردیر.
کئچن هفته، فوولاد و استقلال، اویونچولارین کرونایا یولوخدوغو اوچون نساجی و پارس جنوبی جم قارشیندا اوینامادیلار.
عینی زاماندا، ایران فوتبول پرئمیئر لیگینین داوامی فوتبولچولارین، حاکملرین، مشقچیلرین و اونلارین عائلهلرینین حیاتی اوچون جدّی تهلوکه یارادا بیلهجیی اوچون فوتبول فدراسیونو بو قراری وئردی: «پارس جنوبی جم و نساجی کومانداسینین عضولری، همچینین جم و قائمشهرده اولان حاکملر بو گون تعیین اولونموش واختدا تختی جم استادیومونون ساحهسینه گئدهجک و اویونا حاضیر اولاجاقلار.»
فدراسیون داها سونرا استقلال و فولاد کلوبلاریندان تصدیق ائدیلمیش مرکزلرینده شوبههلی بیلینن اویونچولاردا بیر داها پیسیآر تست ائتمهلرینی ایستهمیی قرارا آلدی. تستین نتیجهلری مئدیایا آچیقلانماسا دا، فوتبول فدراسیونو و لیگ تشکیلاتی تستلرین ایکی کوماندانین اویونچولارینین کرونایا یولوخدوقلارینی تصدیقلهدی.
آنجاق ایران پرئمیئر فوتبول لیگی تشکیلاتی بو گون وئردیگی آچیقلامادا، پرئمیئر لیگنین 24-جو هفتهسیندهکی بوتون اویونلارین اؤنجهدن اعلان ائدیلمیش جدوله اویغون کئچیریلهجهیینی و کوماندالارین بو جدوهلی یئرینه یئتیرمهیه یوکوملو اولدوقلارینی بیلدیردی. بو تشکیلاتین اعلانینداکی آچیقلامادا: «کرونا ایله موباریزه اوزره قرارگاهین ایدمان قولو طرفیندن یاخین ساعتلاردا یئنی بیر امر وئریلسه، 19-جو پرئمیئر لیگینین جدوهلینده ديَیشیکلیک ائدیلهجک».
استقلال و فولاد کلوبلارینین مودورلرینین سسسیزلیگی ایرانداکی کرونا ایله موباریزه اوزره قرارگاهین بعضی مسووللارینین وعدهلریندن قایناقلانیردی. چهارشنبه آخشامی قرارگاه هر ایکی کلوبا ایراندا بوتون فوتبول اویونلارینین یئنیدن لغو اولونما اِحتیمالی اولدوغونو بیلدیردی.
بئلهلیکله، لیگ تشکیلاتی و ایران فدراسیونو سون سؤزو حؤکومتین و کرونا ایله موباریزه اوزره قرارگاها وئرمیش اولدو. بوندان اؤنجه ایران کلوبلارینین پرئمیئر لیگده رقابتینی داوام ائتدیرمک ایستهمهمهسینه باخمایاراق، جمهور باشقانی حسن روحانی شیفاهی شکیلده اؤلکهده پرئمیئر فوتبول اویونلارینین برپا ائدیلمهسینی امر ائتمیشدی.
کرونا ایله موباریزه اوزره قرارگاه پرئمیئر لیگ یاریشلارینین لغوی بارهده امر وئرمسه، جوما «پرسپولیس» تبریزده «ماشین سازینین» قوناغی اولمالیدیر. شهرداری بوشهرده عینی گونده ذوبآهنی قبول ائدهجکتیر.
آنجاق شنبه گونو 26 تیر 1399 دا، آلتی اویون کئچیریلهجک، بونلاردان ان اهميتلیسی استقلالین کرونایا یولوخان کومانداسی «تراکتور» قارشیسیندا اوینایاجاقدیر. تراکتورو قبول ائدهجک اولان استقلال کلوبو کرونا ویروسو سببییله اؤز کاپیتانیندان بو اویوندا یارارلانامایاجاق. فولاد ایسه اهوازدا مسجد سلیمان قارشیسیندا یئر آلاجاقدیر.
ایکی گون اؤنجه، یعنی 17 تیر 1399 تاریخینده لیگ تشکیلاتینین سرپرستی «سهیل مهدی»، استقلالدا کرونایا یولوخان اویونچولارین سایینین 25% چاتدیغینی آچیقلادی. فوتبول فدراسیونونون یئنی پروتکوللارینا گؤره، کرونایا یولوخانلارین سایی 25% چاتان کوماندا پرئمیئر لیگدن کنارا قویولاجاق.
بیر مدت اؤنجه لیگ تشکیلاتی مسووللاری طرفیندن ساغلاملیق پروتکوللارینا عمل ائدیلمهمهسینده گوناهلاندیریلان استقلال فوتبول کومانداسینین سرپرستی «سعید رمضانی» دئدی: "فیکریمیزجه، بو پروتکوللار بیر تبلیغات و شوو ایدی، آمّا بیز یئنه ده پروتوکوللارا اویدق".
جوما آخشامی، صحیه ناظرلیگینین سؤزچوسو «سیما سادات لاری» رسمی اولاراق ایرانداکی کرونادان اؤلنلرین ساییسینین رکورد قیردیغینی و بیر گونده 225 نفرین اؤلدوغونو اعلان ائتمهسینه باخمایاراق، لیگ تشکیلاتی لیگین بوتون اؤلکهده کئچیریلمهسینه قرار وئریب.
از بخش پاسخگویی دیدن کنید
در این بخش ایران وایر میتوانید با مسوولان تماس بگیرید و کارزار خود را برای مشکلات مختلف راهاندازی کنید
یوروم یازماق