سزادانی دوو مامۆستای زمانی کوردی لە سنە بە ۲۰ ساڵ زیندان

"ئیدریس مێنبەری" و "سروە پوورمحەمەدی"، چالاکانی مەدەنی و مامۆستایانی زمانی کوردی، هەر یەکەیان بە ۱۰ساڵ زیندانی تەعزیری سزا دراون. 

بەپێی ڕاپۆرتی ڕێکخراوی مافی مرۆڤی هەنگاو، سزای زیندانی ئەم دوو چالاکە مەدەنییە ڕۆژی پێنج‌شەمە ٤ی خەزەڵوەری ۱٤۰۲، بە شێوەی فەرمی بە پارێزەرانی ئیدریس مێنبەری ڕاگەیاندراوە. 

لقی یەکەمی دادگای شۆڕشی سنە بە سەرۆکایەتی دادوەر کەرەمی، ئەم دوو مامۆستایەی زمانی کوردی و یەکێک لە ئەندامانی دەستەی بەڕێوەبەرایەتی ئەنجومەنی کۆمەڵایەتی "نۆژین"ی بە "پێکهێنانی گرووپ و دەستە" تۆمەتبار کردووە. 

ئیدریس مێنبەری لە کاردانەوە بەرامبەر دەرکردنی ئەم سزایە لە لاپەڕەی تایبەتی خۆی لە تۆڕە کۆمەڵایەتییەکان‌دا نووسیویەتی "ئەم سزایە بە تۆمەتگەلێکی وەک بەدواداچوون بۆ لاپەڕەی میدیای هەنگاو، بەشداریی لە ڕێ‌وڕەسمی ئەسپەردەکردنی ژینا ئەمینی، بە فەرمی ناسینی بزووتنەوەی ژن، ژیان، ئازادی، ڕێبەرایەتی ئەنجومەنی فەرهەنگی نۆژین لە ئاراستەی بەڕێوەبردنی کارگەی پەروەردە سەبارەت بە بابەتی فیدرالیزم و چەند تۆمەتێکی دیکە دەرکردووە."

بەڕێز مێنبەری ڕۆژی یەکشەمە ۲۷ی سەرماوەزی ۱٤۰۱، لە لایەن هێزە ئەمنییەتییەکانەوه دەستیر کرا و لە ۹ی ڕێبەندانی هەمان ساڵ‌دا، و لە دوای ٤۳ ڕۆژ دەستبەسەر بوون بە دانانی بارمتە بە بڕی یەک میلیارد تمەن بە شێوەی کاتی تا کۆتایی قۆناغەکانی دادگایی ئازاد کرابوو. 

 هەروەها سروە پوورمحەمەدی ڕۆژی یەکشەمە ۹ی ڕێبەندانی ۱٤۰۱، لە دوای سەردانی دادگای شۆڕشی سنە بۆ بەدواداچوونی دۆسیەی دەستگیرکراوانی ئەنجومەنی نۆژین، لە لایەن هێزە حکوومەتییەکانەوە دەستگیر کرا و ڕۆژی دووشەمە ۲٤ی ڕێبەندانی هەمان ساڵ دوای قۆناغەکانی لێکۆلینەوە ئازاد کرا.