بوغدانین قیمتی‌نین رسمی آچیقلانماسی اونلا باغلی اورونلرین آرتیمی ایله باغلی اؤن گؤرولری تصدیقله‌ییب. دونن میلی بوغدا اکینچیلری وقفی‌نین معاونی بوغدا ایله باغلی اصناف و صنایع اوچون بوغدانین کیلوسونو ۱۲ مین تومن اولاراق آچیقلاییب.
همشهری‌یه گؤره؛ بوغدا اوچون بللی ائدیلمیش نرخ بو اورونو توکتن صنایع و اصناف اوچون اونون هر کیلوگرمی‌نین قیمتینی ۱۶ مین تومنه قدر آرتیریر. اوزمانلارین فیکرینجه، بو رقم ماکارونی قیمتینی ۲ قات، چؤرگین قیمتینی ایسه ۴ قات آرتیراجاق.
۱۴۰۰-جو ایلده اونون ۳ تور قیمتی وارایدی و اصناف و صنایع بو محصولو موختلیف قیمتلرله آلدیلار. یارانه اون ایله چؤرک‌خانالاری اونون هر کیلوسو اوچون ۶۶۵ تومن، فانتزی چؤرک‌خانالار اوچون اوچون ۹۰۰ تومن، اون صنایع‌لری اوچون ۲۷۰۰ تومن ایدی کی، بو دا اکینچیلرین هر کیلوگرم بوغدانین ۵ مین تومندن آلینماسی دئمکدیر.
بو ایل ایسه اکینچیلردن هر کیلو بوغدانین ضمانتلی آلینماسی دؤولته ۱۱ مین ۵۰۰ تومنه باشا گلیب و بو ایکی‌قات قیمت آرتیمی اکینچیلر اوچون فایدالی اولسا دا، موطلق اوندان آسیلی اورونلرین اورتیمی‌نین مایا ديری‌نین آرتماسی ایله موشایعت اولوناجاق.
ایران قیدا صنایع‌سی بیرلیگی‌نین رئیسی‌نین سؤزلرینه گؤره، دؤولت بوغداسی‌نین اصناف و صنایع‌لره ساتیش قیمتی‌نین ۲۷۰۰ تومندن ۱۲ مین تومنه یوکسلدیکدن سونرا اونون قیمتی قالخاراق ۱۶ مین تومنه چاتیب.
محمدرضا مرتضوی بوغدانین قیمتی‌نین آرتیریلماسی‌نین ماکارونی‌ده اولاجاق سونوجلارینا توخوناراق علاوه ائدیب: اگر ماکارونون هر کیلوسو ۱۲ مین تومندیرسه، بوغدانین قیمتینی ديیشدیرمکله اونون قیمتی هر کیلو دا ۲۵ مین تومنه چاتاجاق.
یوروم یازماق