ایران‌وایره چاتان خبره گؤره تورک مدنی فعال و ایدمانچی کریم اسماعیل زاده‌نین ۶ آیلیق حبس حؤکمو دوغو آذربایجان ایالتی‌نین تئمییز محکمهسینین ایکینجی شؤبه‌سینده جناب علیقلی، کریم‌زاده و سلیمان قبایلی طرفیندن تصدیقله‌نیب.
بوندان اؤنجه تبریز اینقیلاب محکمهسینین بیرینجی شؤبه‌سی قرار چیخاراراق کریم اسماعیل زاده‌یه ۶ آی حبس جزاسی وئرمیش، عبدالله انصاری و ابراهیم رضایی آدلی داها ایکی آذربایجانلی مدنی فعالا براعت وئرمیشدی.
دوغو آذربایجان وکیللر بیرلیگی‌نین اینسان حاقلاری کمیسیونونون عضوو و جناب اسماعیل‌زاده‌نین وکیلی عسگر محمدی ایلکین محکمه‌‌ده ایسلام جمهورییتی سیستمینه قارشی تبلیغات فعالیتی اتهامی ایله چیخاریلان حؤکمه اعتراض ائدیب و تبریز ساوجیسی جناب علیلو، اؤلکه‌نین گوونلیگینی پوزماق مقصدی ایله توپلاشماق و ال بیر اولماق اتهامی ایله چیخاریلان براعت حؤکمونه اعتراض ائدیب و ایلکین حؤکم ده تئمییز محکمه‌‌سی طرفیندن تصدیقله‌نیب.
تهدیدلر، چاغیریشلار، دؤیولمه‌لر و حبسلر کئچمیشی اولان کریم اسماعیل‌زاده ۲۵ مرداد ۱۴۰۲-جی ایلده استادیوما داخیل اولارکن گوونلیک ایشچیلری و موغان شهری‌نین مدنی فعاللاری عبدالله انصاری، مهدی نصیرزاده و ابراهیم رضایی ایله بیرلیکده اونون قارشیسینی آلاراق دؤیه‌رک حبس ائتدیلر.
جناب اسماعیل‌زاده ۲۸ مرداد گونو گیروو قارشیلیغیندا تبریز عومومی و اینقلاب محکمهسینین ۱۰-جو شؤبه‌سی طرفیندن محکمه‌یه قدر سربست بوراخیلمیشدی.
از بخش پاسخگویی دیدن کنید
در این بخش ایران وایر می‌توانید با مسوولان تماس بگیرید و کارزار خود را برای مشکلات مختلف راه‌اندازی کنید
یوروم یازماق