آرژانتین ایرانین داخیلی ایشلر ناظری احمد وحیدی‌نی ۳۰ ایل اؤنجه بوئنوس آیرس‌ده یهودی مدنيت مرکزی‌نین پارتلادیلماسیندا الی اولماقدا اتهام ائدره‌ک حبسینی ایسته‌ییب. جناب وحیدی حاضردا خاریجی سفرده‌دیر.
آرژانتین خاریجی ایشلر ناظرلیگی‌نین آچیقلاماسیندا بیلدیریلیر کی، اؤلکه احمد وحیدی‌نین حبسی اوچون اینتر پولا باش ووروب.
۱۳۷۳-جو ایلده آرژانتین‌ده (آمیا) یهودی مرکزینه بومب قویولماسی زامانی ۸۵ نفر اؤلوب، ۳۰۰ نفر یارالانیب.
۱۴۰۰-جو ایلین مرداد آییندا ابراهیم رئیسی حؤکومتی‌نین احمد وحیدی‌نین داخیلی ایشلر ناظری سئچیلمه‌سینی آمیا قوربانلارینا و بو اؤلکه‌نین محکمه سیستمینه اهانت کیمی قیمتلندیردی.
ایران یهودی مرکزی‌نین پارتلادیلماسیندا ایشتیراکینی اینکار ائدیر.
ایرانین داخیلی ایشلر ناظری جناب وحیدی آرتیق جمهورباشقانی ابراهیم رئیسی و ایران حؤکومتی‌نین یوکسک روتبه‌لی نوماینده هئیتی ایله بیرلیکده پاکیستان و سریلانکایا گئدیب.
بوندان اؤنجه حوقوق ساوونوجولاری ابراهیم رئیسی‌نین خاریجی سفرلری زامانی حبس اولونماسینی طلب ائدیبلر. جناب رئیسی‌نین ۱۳۶۷-جی ایلین یاییندا سیاسی محبوسلارین اؤلدورولمه‌سینده بیرباشا رولو اولوب.
بو پارتلاییش آرژانتین تاریخینده‌کی ان اؤلومجول پارتلاییشدیر و ۳۰ ایل سونرا آرژانتین‌ده هله ده چوخلو سیاسی حاشیه‌لره نه‌دن اولوب.
ان سون حادثه‌‌‌لردن بیرینده، بو ایل ۲۴ فروردین‌ده آرژانتین محکمه‌‌سی وئردیگی آچیقلامادا آمیا یهودی مرکزینه بومب قویولماسی لوبنانین حزب‌الله قروپلاشماسی طرفیندن حیاتا کئچیریلدیگینی و تهرانین سیفاریشی ایله ائدیلدیگینی بیلدیریب.
از بخش پاسخگویی دیدن کنید
در این بخش ایران وایر می‌توانید با مسوولان تماس بگیرید و کارزار خود را برای مشکلات مختلف راه‌اندازی کنید
یوروم یازماق