گوونلیک و محکمه قوروملاری‌نین آذربایجانلی وکیللره قارشی تضییقلری‌نین داوام ائتمه‌سی ایله عینی واختدا تبریزده وکیل نگین کیانی حبس ائدیلیب.
داها اؤنجه گوونلیک گوجلری طرفیندن حبس ائدیلن باشقا تبریزلی وکیل قاسم بعدی ایسه تبریز حبس‌خاناسیندا آجلیق آکسییاسینا باشلاییب.
ایران‌وایرین آلدیغی خبرلره گؤره، دوغو آذربایجان ایالتی‌نین وکیللر بیرلیگی‌نین عضوو نگین کیانی گوونلیک گوجلری طرفیندن حبس ائدیله‌رک تبریز حبس‌خاناسینا آپاریلیب. بو خبری وکیل جعفر افشاری‌نیا اؤز اینستاگرام صفحه‌‌‌سینده یاییب و یازیب کی، نگین کیانی محبوسلارین وکیللیگینی قبول ائتدیگینه و اعتراض آکسییالاریندا ایشتیراک ائتدیگینه گؤره ایکی هفته اؤنجه‌دن ساخلانیلیب و تبریز زیندانیندا حبسده‌دیر. نگین کیانی دوغو آذربایجان ایالتی وکیللر بیرلیگی‌نین سون هفته‌لرده حبس ائدیلن دؤردونجو عضوودور.
اؤنجه‌لر دوغو آذربایجان وکیللر بیرلیگی‌نین اینسان حاقلاری کمیسیونونون معاونی سینا یوسفی و بو کمیسیونون باشقا عضولری امیر مهدی‌پور و قاسم بعدی‌نین ساوونما کمیته‌سی یارادیلماسی خبریندن سونرا گوونلیک گوجلری طرفیندن حبس ائدیلیب.
سون بیر نئچه گونده سینا یوسفی و امیر مهدی‌پور گیروو قویدوقدان سونرا تبریز حبس‌خاناسیندان سربست بوراخیلیبلار. آنجاق قاسم بعدی هله ده بو حبس‌خانادا حبسده‌دیر. ۲۳ مهر ۱۴۰۱-ده ائوینده حبس ائدیلن بو اینسان حاقلاری وکیلی تبریز حبس‌خاناسیندا ساخلانما و قرارسیزلیغا اعتراض اولاراق آجلیق آکسییاسینا باشلاییب. قاسمین آجلیق آکسییاسی اعلان ائتمه‌سینه جاواب اولاراق تبریز حبس‌خاناسی‌نین یئتکیلیلری اونو تجریدخانایا کؤچوروب و اونون عائله‌‌‌سی ایله گؤروشمه‌سینه و تلفون دانیشیقلارینا ایجازه وئرمه‌ییب.
از بخش پاسخگویی دیدن کنید
در این بخش ایران وایر می‌توانید با مسوولان تماس بگیرید و کارزار خود را برای مشکلات مختلف راه‌اندازی کنید
یوروم یازماق