تهران پولیس کوماندانلیغینین خبرلشمه مرکزی بیلدیریش یایاراق پولیس نظارتینده اولان بیر وطنداشین اؤلومونو تصدیقلهییب، لاکین اونون اؤلومونون مجبوری حجابلا هئچ بیر باغلانتیسی اولمادیغینی ادعا ائدیب.
چارشنبه آخشامی، ۲۸ فروردین سوسیال شبکه قوللانیجیلاری تهرانین وزرا تجریدخاناسینین قارشیسیندا یاشلی والیدئینین شکلینی درج ائدیب و بعضیلری مهسا امینینین قتلی فاجعهسینین تکرارلانماسی و ایسلام جمهورییتینین اخلاق پولیسی طرفیندن بیر قادینین اؤلدورولمهسی بارهده فرضيهلر سسلندیریبلر.
بو بارهده تهران پولیسی بیلگی یاییب کی، وزرا بیناسیندا حجابا گؤره اؤلوم خبری یالاندیر و بو بینا قولدورلارا و پئشهکار اوغرولارا قارشی موباریزه مرکزیدیر و باشقا سوچلار ایله هئچ بیر باغلانتیسی یوخدور.
پولیس نظارتینده اولان وطنداشین اؤلومونون تصویرینده بو بیلدیریش یازیلیب: تهرانین قولدورلاریندان بیری و ۹ حبس و اینسانلارلا موباحیثه و موناقیشه کئچمیشی، بیر نئچه دفعه قادینلارا ساتاشما، اتومبیل اوغورلوغو و اتومبیل شوشهلرینی سیندیرماق، هابئله نارکوتیک مادهلرین پایلانماسی ایله باغلی چوخسایلی قئیدلری اولان، نوروز بایرامیندا حبس اولوناراق حبس خانایا کؤچورولوب.
بو بیلدیریشده دئییلر: بو شخص جینایت یئرینین یئنیدن قورولماسی و شاهیدلرله اوز-اوزه گلمک اوچون جینایت اورتاقلاری ایله بیرلیکده حادثه یئرینه گؤندریلیب و کؤچورولمه زامانی و حادثه یئرینین یئنیدن قورولماسینا قدر اونون بیلینج سویهسینین آشاغی دوشمهسی ایله اوزلشیب.
تهران پولیسینین ادعاسینا گؤره، بو شخص بلیرسیز بیر حبدن ایستیفاده ائدیب و اؤلوب.
هلهلیک هئچ بیر مستقل منبع تهران پولیسینین ادعالارینی تصدیقلهمهییب.
ایسلام جمهورییتی ۲۵ فروردین شنبه گونو سحر ساعتلاریندان اعتباراً مجبوری حجاب تاخمایان قادینلارا قارشی موباریزه آپارماق اوچون پولیس قوهلرینین، بسیج و سیویل گئییملی مامورلارین ایشتیراکینی بیر داها آرتیریب، سوسیال شبکهلرده قادینلارا قارشی زوراکیلیغی عکس ائتدیرن و مجبوری حجاب بهانهسی ایله حبس ائدیلن بیر چوخ شکیللر و ویدئولار یاییملانیب.
از بخش پاسخگویی دیدن کنید
در این بخش ایران وایر میتوانید با مسوولان تماس بگیرید و کارزار خود را برای مشکلات مختلف راهاندازی کنید
یوروم یازماق