سیاسی محبوس حامد قره‌اوغلانی ۲ گوندور آجلیق آکسییاسی‌ کئچیریر

سیاسی محبوس و تهرانین شهید بهشتی بیلیم‌یوردونون حبسده اولان اؤیرنجیسی حامد قره‌اوغلانی محکمه‌‌ حاکیميتی‌نین اونون مرخصی ایسته‌یینه قارشی چیخماسینا اعتراض اولاراق آجلیق آکسییاسینا باشلاییب.

حبسده اولان بو اؤیرنجی ۷ تیر ۱۳۹۹-دا اطلاعات ناظرلیگی طرفیندن حبس ائدیلمیش و بیر نئچه گونلوک سورغو-سؤالدان سونرا ۲۶ تیر ۱۳۹۹-دا اورمیه زیندانینا کؤچورولموشدور.

۱۳۹۹-جو ایلین آذر آییندا حامد قره‌اوغلانی  اورمیه اینقیلاب محکمه‌‌سی‌نین ایکی حاکمی طرفیندن ۱۴ ایل بیر آی حبس جزاسینا محکوم ائدیلدی و باشقا بیر حاکم ده اونو اعداما محکوم ائتدی.

۱۳۹۹-جو ایلین بهمن آییندا عالی محکمه‌‌ ایلک ایکی حاکمین حؤکمونو نظرده توتاراق اوچونجو حاکمین چیخاردیغی حؤکمو لغو ائتدی و بو یوللا ایسلام جینایت قانونونون ۱۳۴-جو ماده‌‌سینه اساسلاناراق، اونا ان آغیر جزا، یعنی ۱۳ ایل حبس جزاسی کسیلدی.

حبس ائدیلن بو اؤیرنجی "رژیمه قارشی تبلیغات"، "رهبره اهانت ائتمک" و "موخالیف قروپلارلا ایشبیرلیگی" اتهاملاری ایله جزالاندیریلیر و محکمه سورجینده بو اؤیرنجی بوتون اتهاملاری رد ائدیب.

۱۳۹۹-جو ایلین دی آیی‌نین سونلاریندا بو سیاسی محبوس، محکمه‌‌ حاکمیتی صدری ابراهیم رئیسی‌یه آچیق بیر مکتوب یایاراق، اونا قارشی چیخاریلان حؤکملری ایسلام جمهورییتی‌نین گوونلیک اورقانلاری‌نین "ساختا پرونده حاضرلامالاری‌نین" نتیجه‌سینده اولدوغونو آچیقلادی.  حبسده اولان اؤیرنجی گوونلیک اورقانلاری‌نین عائله‌‌‌ عضولرینه ائتدیگی تضییقلردن بحث ائده‌رک یازدی: "جناب رئیسی! سیزدن یالنیز بیر خواهشیم وار. شوعارلارینیزا صادقسینیزسه، گوونلیک اورقانلاری‌نین من و عائله‌‌‌م اوچون یاراتدیغی جهنمه سون وئرین."

حبسده اولان بو اؤیرنجی صرع خسته‌لیگیندن اذيت چکدیگی اوچون ۱۳ ایللیک جزاسینی مرخصی حوقوقو اولمادان چکیر.