سپیده رشنو اوچ ایللیک حبس جزاسی‌نین ایجرا اولوناجاغینی بیلدیریب

مجبوری حجابین موخالیفی، یازیچی و شاعر سپیده رشنو اینستاگرام حسابیندا ۳ ایل ۱۱ آی حبس جزاسی‌نین حؤکم ایجرا شؤبه‌سینه گئتدیگینی و حبس‌خانا گؤندریله‌جه‌یینی بیلدیریب.

او یازیب کی، جزاسی ایسلام جمهورییتی‌نین حؤکم ایجرا شؤبه‌سینه گؤندریلن کیمی اونون اؤلکه‌دن چیخیشینا قاداغا قویولوب.

سپیده رشنو داها سونرا یازیب: “چیخماق نيتی اولمایان شخص اوچون چیخیش قاداغاسی قویولوب”.

۱۴۰۲-جی ایل آذر آیییندا سپیده رشنونون وکیلی‌، تهران ایالتی‌نین تئمییز محکمه‌‌سی اونون مووکیلی اوچون “دؤرد آیلیق قطعی حبس” قراری وئردیگینی و بو یازیچی و مدنی فعالین ایکی پرونده اوزره توپلام اوچ ایل ۱۱ آی قطعی حبس جزاسی آلدیغینی بیلدیرمیشدی.

خانیم رشنونون وکیلی میلاد پناهی‌پور، چارشنبه‌ آخشامی، ۱۴ آذرده “شرق” خبر آژانسی ایله صؤحبتینده دئییب کی، خانیم رشنو بو جزایا “سانال اورتامدا ادبسیز شکیللری درج ائتمک” اتهامی ایله محکوم ائدیلیب.

خانیم رشنونون وکیلی‌نین سؤزلرینه گؤره، اونا قارشی یئنی پرونده‌نین آچیلماسی اینستاگرام‌دا “اؤز شکلینی”  یایماسی و “الزهرا بیلیم‌یوردونون اینتیظام کومیته‌سی‌نین حؤکمو” باره‌ده بیلگی وئرمه‌سی ایله باغلیدیر.

سپیده رشنو ۷ آبان گونو اینستاگرام‌دا یازیب کی، اونون باره‌سینده چیخاریلان یئنی حؤکمه اساساً، “بیرینجی پرونده (تیر آیی اتوبوسو)” اوزره حبس جزاسی دایاندیریلاجاق.

مهسا امینی‌نین اؤلوموندن اوچ آی اؤنجه مجبوری حجابا اعتراض اولاراق اخلاق پولیسی‌نین نظارتینده ساخلانیلاراق ایشگنجه‌لره معروض قالیب و مجبوری اعترافا مجبور ائدیلمیشدی. بو ترجومه‌چی و ادیتور ۱۰ مهر گونو حجابسیز بیر شکلینی یایاراق اؤزونو ساوونماق اوچون وکیلی ایله بیرلیکده حجابسیز اولاراق محکمه‌ده حاضیر اولاجاغینی بیلدیرمیشدی.

بو ترجومه‌چی و ادیتور بو ایلین خرداد آییندا اعلان ائتدی کی، یئنیدن چاغیریلدیقدان سونرا بیر میلیارد تومن گیروو قارشیلیغیندا سربست بوراخیلیب، لاکین اونا “تهرانی ترک ائتمک قاداغاندیر”. بوندان اؤنجه او، الزهرا بیلیم‌یوردوندا “ایسلامی گئییملره رعایت ائتمه‌دیگی” سببیله بیلیم‌یوردونا گیریشی و ایکی دؤنم ائیتیمی کئچمیش ایللری داخیل اولماقلا قاداغان ائتدیگینی آچیقلامیشدی.