ایرانوایره گلن خبرلره گؤره، تبریزین مرکزی حبسخاناسیندا حبسده اولان “تبریزین قیزی” آدلی ایله تانینان اعتراضچی “رویا ذاکری” یئنیدن بو شهردهکی رازی عصب و روحی خستهخاناسینا کؤچورولوب.
بو خبری تورک وکیل “سینا یوسفی” ایکس سوسیال شبکهسیندهکی صفحهسینده آچیقلاییب و یازیب کی، رویا ذاکری ۱۱ فروردین شنبه گونو رازی خستهخاناسیندا خامنهاییه قارشی شوعار سسلندیردیگینه گؤره دؤولت مامورلاری طرفیندن دؤیولهرک تجریدخانایا آپاریلیب.
جناب یوسفینین دئدیگینه گؤره، رویا ذاکری حاضردا اطلاعات مامورلارینین نظارتی آلتیندا گؤروش قاداغاسی ایله رازی خستهخاناسینین بوعلی شؤبهسینه یاتیریلیب و اونون حیاتی تهلوکه آلتیندادیر.
ایسلام جمهورییتی یئتکیلیلری اعتراض ائدن بو گنج قادینی ایکینجی دفعهدیر کی، روحی خستهخاناسیندا حبس ائدیر.
سوسیال مئدیادا تبریزین قیزی کیمی تانینان بو اعتراضچی قیز ۱۴۰۲-جی ایلین مهر آیییندا حجاب قورویوجولاری ایله توققوشدوقدان و خامنهاییه قارشی اؤلوم شوعارلاری سسلندیردیکدن سونرا حبس ائدیلیب و تبریزده رازی روحی خستهلیکلری خستهخاناسینا آپاریلیب.
او، داها اؤنجه حادثه ایله ایلگیلی دئمیشدی: “او گون بانک کارتیم بلوکلاندیغی اوچون فتا پولیسینه گئتدیم، دئدیلر کی، سیزین بانک کارتینیز بیر داها آچیلمایاجاق. جاوابیندا دئدیم کی، اگر منه دوزگون جاواب وئرمهسن، من بورادان گئتمهیهجهیم و تک بونا گؤره منی ۵ گون تبریزده مرکزی تجریدخانادا ساخلادیلار، درحال آجلیق آکسییاسی کئچیردیم و حبسدن چیخاندان سونرا گلیب کوچهده اعتراضیمی بیلدیردیم”.
رویا ذاکری آیریجا بیر ویدئودا وورغولامیشدی کی، او، موکممل فیزیکی و روحی ساغلیقدادیر، لاکین ایسلام جمهورییتی اونو “روحی خسته” کیمی گؤسترمهیه چالیشیر.
از بخش پاسخگویی دیدن کنید
در این بخش ایران وایر میتوانید با مسوولان تماس بگیرید و کارزار خود را برای مشکلات مختلف راهاندازی کنید
یوروم یازماق