اؤیرنجی فعال و تهران بیلیمیوردونون ایسلام درنیینین کئچمیش کاتیبی مطهره گونهای بازار گونو، ۱۶ اردیبهشتده گیروو قارشیلیغیندا اوین حبسخاناسیندان سربست بوراخیلیب.
یاییملانان بیلگیلره گؤره، خانیم گونهاینین آزادلیغا بوراخیلماسی مووقتی اولاراق و بیر میلیارد ۲۰۰ میلیون تومن گیروولا حیاتا کئچیریلیب.
تهران بیلیمیوردونون بو سورگوندهکی دیش حکیمی اؤیرنجیسی چارشنبه گونو، ۱۲ اردیبهشت گونو تلفونلا چاغیریلدیقدان سونرا حبس ائدیلیب و اوین حبسخاناسینا آپاریلیب.
“سیستمه قارشی تبلیغات” و “رهبری تحقیر ائتمک” ایسلام جمهورییتینین محکمه سیستمینین مطهره گونهاییه قارشی ایرهلی سوردویو ایکی اتهامدیر.
مطهره گونهای داها اؤنجه تهران موسیقی ائوینین قارشیسیندا باشقا بیر اؤیرنجی فعال "خشیار سفیدی" ایله بیرلیکده "توماج صالحی"نین اعدام حؤکمونه اعتراض ائتمیشدی و او واختدان بری گوونلیک اورقانلارینین تضییقی آلتیندا ایدی.
حبسیندن بیر گون اؤنجه خانیم گونهای "اماکن پولیس آدی آلتیندا ثارالله اینقیلاب کئشیکچیلری طرفیندن" چاغیریلدیغینی بیلدیرمیشدی. او، عائلهسینین تضییقلریندن ده دانیشیب و اونلار طرفیندن “ائو دوستاقلیغی” ایله هدهلندیگینی یازیب.
۱۴۰۲-جی ایلین اردیبهشت آییندا دیش حکیملیگی اوزره اؤیرنجیلیگینین سون دؤنمینده اولارکن مطهره گونهای بیلیمیوردونون اینتیظام شوراسینین ایلکین قرارینا اساساً "فاکولتهده ایغتیشاشلار و قاریشیقلیق یاراتماق" اتهامی ایله بیلیمیوردوندان قووولماغا و بئش ایل مدتینه بیلیمیوردلاریندا ائیتیم آلماسینا قاداغا قویولدو. اینتیظام کومیتهسینین تئمییز محکمهسی اونون ائیتیم یئرینین ديیشدیریلمهسی و اردبیل طب علملری بیلیمیوردونا سورگون ائدیلمهسی ایله باغلی یئنی قرار وئرمیشدی.
او، داها اؤنجه مهسا امینینین قتلیندن سونرا عومومی اعتراضلار زامانی ایسلام جمهورییتینین حؤکومت گوجلری طرفیندن حبس ائدیلیب.
یوروم یازماق