ایراندا ان بؤیوک معدنی و دامپتراک تکرلر اورتیجیسی اولان کیان تایر مولکیتی‌نین بلیرسیزلیگی، ماليه و خامماللا باغلی پروبلئملر سببیندن باغلانیب و ان آزی ۱۲۰۰ ایشچی ایشینی ایتیریب.
چارشنبه گونو، ۲۴ فروردین ۱۴۰۱، ایرنا خبر آژانسی بیلگی وئردی کی، بیر نئچه گون اؤنجه فابریک ایشچیلر اوچون باغلانیب و ۱۲۰۰ نفره یاخین عائله ایشسیزلیکله اوزلشیب.
ایرنانین بیلگیلی قایناغا ایستناداً وئردیگی خبره گؤره، تهران ایالتی‌نین چهاردانگه بؤلگه‌سینده یئرلشن کیان تایر فابریکی ۱۳۷۰-جی ایللرده اؤزل‌لشدیریلیب، لاکین گؤرونن او کی آلیجی اورانین باهالی اراضی‌سینی اله کئچیرمه‌سینی جهد ائتمیشدی.
معدن سئکتورو اوچون تکر اورتن شرکت باشقا اکینچیلیک و یولجو اتومبیل تکرلری، حربی ماشین تکرلری و حتی بؤیوک و اؤزل اؤلچولو تکرلر اورتیمی ایله تانینیردی، آنجاق هئچ واخت بونا بیر یاتیریم قویولمامیشدیر.
ایرنانین بیلگیلی قایناغی سپه و کشاورزی بانکلارینا اولان بورجونون قایتاریلماماسینا ایستیناد ائده‌رک فابریکین مالکین الیندن آلیندیغینی تصدیقله‌ییب: فابریک صاحبینین الیندن چیخاریلدی و بیر نئچه ایل حؤکومت طرفیندن ایداره اولوندو، حتی اونون شخصی صاحبینین حبسده اولدوغو دا ائشیدیلدی.
ایران تایر فابریکی ایلده ۱۵ مین تون لاستیک اورته بیلیردی و محدود شکیلده ده اولسا، ۱۴۰۰-جو ایلین بهمن آیینا قدر لاستیک اورتیمینه داوام ائتدیردی.
رادیو و تلویزیون خبر آژانسی بو خبری تصدیقله‌ییب و یازیب کی، ایران تایر فابریکی ایکی ایل اؤنجه موفلیس اولوب، ایشچیلری ایسه گونده‌لیک ۷۰ تون تکر اورتیلدیگینی بیلدیریبلر.
بو فابریکین ایشچیلری اؤتن گونلرده جمهورباشقانلیغی بیناسی‌نین قارشیسینا توپلاشاراق فابریکین مولکیتی‌نین بللی ائدیلمه‌سینی طلب ائتمیشدیلر.
یوروم یازماق