۴ اساس مالین رسمی باهالاشماسیندان سونرا اینسانلار ماغازالارا آخین ائتدی

ابراهیم رئیسی حؤکومتی جوما آخشامی دؤرد اساس مالین، او جومله‌‌‌دن تویوق، یومورتا، یاغ و سود محصوللاری‌نین قیمتینی آرتیریب. بوندان سونرا بو ماللارین تاپیلماماسی و اینسانلارین ماغازالارا آخینی ایله باغلی بیلگیلر یاییلیب.

یئنی تصدیق اولونموش قیمتلره اساساً، تویوغون هر کیلوگرامی‌نین قیمتی ۶۰ مینه یاخین، ۸۱۰ گرم اولان مایع گونه‌باخان یاغی‌نین قیمتی ۶۳ مین، یومورتانین قیمتی ۴۰ مین، پاکت پنیرین قیمتی ۳۸ مین، نایلون ایچینده‌کی سودون قیمتی ایسه ۱۵ مین تومن اولوب.

بو قیمت آرتیمی، اؤتن گونش ایلینده تزه تویوغون قیمتی‌نین ان آزی یوزده ۲۱ آرتاراق کیلوسو ۳۰ مین بئش یوز تومنه، یومورتانین قیمتی ایسه یوزده ۵۳ آرتاراق کیلوسو تخمیناً ۲۵ مین تومنه چاتدیغیندان سونرا باش وئریب.

بو اساس ماللارین اینانیلماز قیمت آرتیمی حؤکومتین ۴۲۰ تومنلیک دلاری لغو ائتمک و سوبسیدییا سیستمینی ديیشدیرمک پلانیندان سونرا باش وئریر کی، بو دا آرتیق صنایع اونوندا حیاتا کئچیریلیب و صنایع چؤرگی و ماکارون محصوللارینی باهالاشدیریب.

قیمت آرتیمی اعلان ائدیلدیکدن سونرا سوسیال شبکه‌لرده اینسانلارین بیر نئچه ماغازایا آخیشدیغینی عکس ائتدیرن ویدئولار یاییلیب.

تهرانداکی اتکا ماغازاسی ایله باغلی اولدوغو دئییلن بو ویدئولاردان بیرینده وطنداشلار یاغ رفلرینه تلسه‌رک اونلاری آلماغا چالیشیرلار.

بونونلا بئله، دؤولت خبر آژانسی اولان ایرنا دورومون ساکین اولدوغونو ادعا ائده‌رک، بعضی مرکزلرده یالنیز تویوق و یاغ چاتیشمازلیغی‌نین اولدوغونو یازیب.

خبر آژانسی آیریجا ۹۵۰۰ بسیجیدن حؤکومته یاردیم ائتمک و اؤلکه داخیلینده یوخلامالار آپارماق اوچون ایستیفاده ائدیلدیگینی بیلدیریب.

آرتان تورم و چئشیدلی ماللارین قیمتلری‌نین داواملی اولاراق آرتماسی چئشیدلی شهرلرده، اؤزللیکله ده خوزیستان ایالتینده اعتراضلارا سبب اولوب و بو ایالتده، سونرا ایسه بوتون ایراندا اینترنت کسیلیب.