تهران تیجارت اوتاغی‌نین عضوو دئییب: ایران خالچا ایخراجی‌نین دورومو او قدر پیسدیر کی، خالچا ایخراجاتی‌نین رقملرینی آچیقلاماق اوتانج‌وئریجیدیر.
سید رضی حاجی آقامیری ۳ اردیبهشت بازار گونو ایلنایا بیلدیریب کی، ۱۳۶۰-جی ایللرده اؤلکه‌نین خالچا ایخراجی ۱ میلیارد ۷۰۰ میلیون دوللاردان چوخ ایدی، حاضردا بو رقم ۵۰ میلیون دوللارا چاتیب.
تیجارت اوتاغی‌نین عضوو وورغولادی: دونیانین خالچا پایتاختی کیمی تانینان بیر اؤلکه اوچون بو قدر ایخراجات فلاکت و صیفیردیر.
او، بازاردا ایرانلی خالچا رقیبلری‌نین اولماسی باره‌ده ده دئییب: ایرانین یوخلوغوندا احمدی‌نژاد حؤکومتیندن سونرا اوزلشدیگی اولوسلارآراسی پروبلئملر سببیندن خالچا بازارینی رقیبلر اله کئچیردی.
حاجی آقامیری‌نین سؤزلرینه گؤره، حاضردا هیندیستان و پاکیستان خالچا بازاریندا جدی ایشتیراکا مالیکدیر و سون واختلار بو اؤلکه‌لرین سیراسینا افقانیستان دا علاوه اولونوب. بو اؤلکه‌لردن سونرا تورکیه‌نین وارلیغینی گؤروروک.
تهران تیجارت اوتاغی‌نین نوماینده هئیتی‌نین عضوو آرتیریب: چین بو اؤلکه‌لر آراسیندا اولا بیلمز، چونکی اونون توخودوغو و ایخراج ائتدیگی خالچا اؤنملی دئییل، آیریجا چینین ایخراج ائتدیگی خالچا ایران خالچالاریندان دئییل.
آقامیری سؤزونه داوام ائده‌رک بیلدیردی کی، فاکت ایران خالچاسی‌نین اونودولموش اولماسیدیر. بازاردا ائتکیلی مؤوجودیتی اولان، لاکین اوزون مدت بازاردا اولمایان بیر محصول بو مدت ایچینده اونودولوب و رقیبلری اونون یئرینی توتا بیلیب.
بو اقتصادی فعال آیریجا ایران و عربیستان آراسیندا ایلیشگیلرین قورولماسینی ایرانین ال توخونوشو خالچا صنایع‌سی‌نین ایلرله‌مه‌سینه هئچ بیر ائتکی گؤسترمه‌دیگینی دئییب و بیلدیریب کی، عربیستان بازاری اؤنملی بازار حساب ائدیلمیر و خالچا ایخراجی بازاریندا اؤنملی پایا مالیک دئییل کی، ایکی اؤلکه آراسیندا ایلیشگیلرین کسیلمه‌سی ایران خالچاسی ایخراجی‌نین حجمینی آزالدسین و ایلیشگیلرین قورولماسی ایخراجی چوخالتسین.
یوروم یازماق