ایرانوایره چاتان خبره گؤره تورک مدنی فعال، ژورنالیست و سیاسی محبوس ابراهیم رشیدی (ساوالان)، ۲۰۰ میلیون تومنلیک گیروو قارشیلیغیندا ۵۴ گونلوک حبسدن سونرا دونن ۳ اسفند ۱۴۰۲-ده مشگین شهر حبسخاناسیندان سربست بوراخیلیب.
جناب رشیدی ۵۰۰ میلیون تومنلیک گیروو و حبس مدتینه اعتراض ائتدیکدن سونرا اینقیلاب محکمهسینین تصدیقی ایله قامو اویونو راحاتسیز ائتمک مقصدی ایله یالان خبرلر یایماق اتهامی ایله ۱۰۰ میلیون تومنلیک گیروو و ایسلام جمهورییتینه قارشی تبلیغات اتهامی ایله ده ۱۰۰ میلیون تومن گیروو قراری ایله توپلام ۲۰۰ میلیون تومنلیک گیروو قویدوقدان سونرا مشگین شهر حبسخاناسیندان سربست بوراخیلیب.
جناب رشیدی ۹ دی گونو خیاو شهرینین میرکندی کندینده آتاسینین ائوینده گوونلیک گوجلری طرفیندن حبس ائدیلیب و ۱۰ دی ۱۴۰۲-ده اردبیل شهرینین اطلاعات ایدارهسینین تجریدخاناسینا کؤچورولموشدو. او دیندیریلمه سورجی باشا چاتدیقدان سونرا ۲۵ دی ۱۴۰۲-ده اردبیل مرکزی حبسخاناسینا کؤچورولوب.
جناب رشیدی ۷ بهمن ۱۴۰۲-ده آخشام ساعتلاریندا خیاو (مشگین شهر) حبسخاناسینا کؤچورولوب.
ابراهیم رشیدی تانینمیش آراشدیرماجی، ژورنالیست و مدنی فعالیدیر. او، آیدا بیر یاییملانان بایرام و یاییملانماسی قاداغان اولونان نوید آذربایجان درگیلرینین یاییم هئیتینین عضوو، بلاگ یازاری و اولدوز اؤیرنجی ژورنالینین باش مودیری و بولوت اؤیرنجی درگیسینین باش یازاری اولوب.
ابراهیم ساوالان سون ۲۰ ایلده مدنی فعالیتلرینه گؤره دفعهلرله توتولوب، حبس ائدیلیب و ایشگنجهلره معروض قالیب.
یوروم یازماق