۸ آذر ۱۴۰۳-جو ایل جوما آخشامی سحر ایرانین چئشیدلی حبسخانالاریندا بئش محبوس اعدام ائدیلدی. بو حؤکملره شیرازداکی عادل آباد حبسخاناسینداکی اوچ محبوس و قزوین و نهاوند حبسخانالاریندا اولان باشقا ایکی محبوس داخیلدیر.
اینسان حاقلاری مئدیاسینین یایدیغی بیلگیلره گؤره، شیرازین مرکزی حبسخاناسیندا “قصداً آدام اؤلدورمه” اتهامی ایله صفاشهردن اولان ۳۴ یاشلی امین ملکی و نارکوتیکله باغلی جینایتلرده اتهام اولونان مهدی شیروانی و فردین عبداللهینین اعدام حؤکمو ایجرا ائدیلیب. امین ملکی، دؤرد ایل اؤنجهدن و شیروانی و عبداللهی ایلی ایل اؤنجهدن حبسده ایدی. بو اوچ نفر جزانین ایجراسی اوچون سون گونلرده تک آداملیق هوجرهلره کؤچورولوب.
عینی زاماندا نارکوتیکله باغلی جینایتلرده تقصیرلی بیلینن کنگاوردن اولان ۴۶ یاشلی محمد علی طاهرینین اعدام حؤکمو قزوینین چوبیندار حبسخاناسیندا ایجرا اولونوب. آیریجا نهاوند مرکزی حبسخاناسیندا ۴ ایل اؤنجه “قصداً آدام اؤلدورمه” اتهامی ایله حبس ائدیلن و موحاکیمه اولونان هادی قیاسینین اعدام حؤکمو ایجرا ائدیلیب.
بو آنا قدر هئچ بیر حؤکومت و رسمی مئدیا، او جوملهدن عدليه سیستمینه یاخین مئدیا بو اعداملاری درج ائتمهییب. اینسان حاقلاری تشکیلاتلاری بو خبری آچیقلاماقلا بیر داها ایران محکمه سیستمینین اعدام حؤکمونون ایجراسی ایله باغلی شفافلیغینین اولمادیغینی تنقید ائدیبلر.
بو اعداملار ایرانین هله ده اعدام حؤکموندن گئنیش ایستیفاده ائدن اؤلکهلر لیستینده بیرینجی یئرده اولدوغو بیر واختدا حیاتا کئچیریلیب.
یوروم یازماق